Ватыкан: прэзентацыя зборніка катэхез “Сям’я: праца і свята”
24 мая ў Ватыкане
адбылася прэзентацыя дакумента “Сям’я: праца і свята”, які з’яўляецца зборнікам катэхез,
падрыхтаваных спецыяльна да VII Сусветнага форума сем’яў, што пройдзе з 30 мая па
3 чэрвеня 2012 г. у Мілане.
Падчас прэзентацыі дакумента кардынал Эніё Антанэллі,
прэфект Папскай рады па справах сям’і, расказаў аб стварэнні новага сайта дыкастэрыі,
мэта якога інфармаваць аб дзейнасці гэтага органа Рымскай курыі і яго праектах, а
таксама заахвочваць лакальныя касцёлы і свецкіх вернікаў да супрацоўніцтва ў галіне
абароны сям’і і жыцця.
Іерарх расказаў аб тым, што 13 мая 1981 г., у дзень
замаху на Яна Паўла ІІ, Святым Айцом была афіцыйна ўстаноўлена Папская рада па справах
сям’і і Папскі інстытут па вывучэнні сужэнства і сям’і, які сёння носіць імя благаслаўлёнага
Папы. Акрамя таго ў гэтым годзе адзначаецца 30-я гадавіна Апостальскага ліста Яна
Паўла ІІ “Familiaris consortio” аб ролі хрысціянскай сям’і ў сучасным свеце. Кардынал
Антанэллі сказаў, што і сёння ў святле гэтага дакумента, установы створаныя Пантыфікам
займаюцца абаронай сямейных каштоўнасцяў. “Папская рада па справах сям’і на сённяшні
дзень складаецца з кардынала кіраўніка, трынаццаці супрацоўнікаў, 25 кардыналаў і
бікупаў, якія ўваходзяць у кіраўнічы камітэт, 20 сямейных пар членаў рады, а таксама
40 экспертаў, што працуюць у якасці кансультантаў”, - расказаў іерарх.
Кардынал
Антанэллі адзначыў таксама, што форум сем’яў які пройдзе ў наступным годзе ў Мілане
будзе насіць тэалагічна-пастырскі характар. Падчас яго будуць праходзіць супольныя
малітвы, рабіцца даклады, весціся тэматычныя дыскусіі. Цікава, што на кангрэсе будуць
прысутнічац і дзеці ўдзельнікаў. Для іх будзе арганізавана спецыяльная праграма. У
апошнія дні сустрэчы ўдзельнікі мерапрыемства будуць мець магчымасць сустрэцца з папам
Бэнэдыктам XVI.
Прэфект Папскай рады па справах сям’і заклікаў да духоўнай
падрыхтоўкі да гэтага форума, на нацыянальным, дыяцэзіяльным і парафіяльным узроўнях.