Nënshkruhet marrëveshja ndërmjet Selisë së Shenjtë e Kroacisë për mësimdhënien në
shkollat katolike
Në frontin diplomatik, dita e djeshme qe mjaft e rëndësishme për Selinë e Shenjtë,
e cila nënshkroi marrëveshjen e zbatimit të Konventës së firmosur 15 vjet më parë
me Republikën e Kroacisë, përsa i përket bashkëpunimit në fushën edukative dhe kulturore.
Dokumenti i njeh Kishës Katolike të drejtën të hapë shkolla të çdo niveli e përcakton
edhe detyrimet e shtetit për to, përfshirë pagat e mësuesve. Marrëveshja vendos
edhe normat e regjistrimit, llojin e mësimdhënies, mënyrën e emërimit të drejtuesve,
si edhe mënyrën e miratimit të statutit të shkollave katolike, në përputhje me legjislacionin
kroat e me parimet themelore të edukimit katolik. Kujtojmë se Papa Benedikti XVI
do të shkojë në Kroaci më 4 e 5 qershorin e ardhshëm. Kryetari i Konferencës Ipeshkvnore
Kroate, imzot Marin Srakiç theksoi se shkollat katolike janë të hapura për të gjithë
e, përmendi shembullin e Kosovës, ku 90% e nxënësve të shkollave katolike janë myslimanë.