Me ftesën e Papës, Kisha lutet për katolikët në Kinë. Reflektim i një sinologu të
Institutit Papnor të Misioneve të Jashtme.
Në ditën kur liturgjia kujton Zojën Ndihmë e të Krishterëve, apo Zojën Ndihmëtare,
siç njihet ndër shqiptarë, Kisha universale, me ftesën e Papës Benedikti XVI, lutet
për katolikët në Kinë. Edhe ata e nderojnë veçanërisht Zojën Ndihmëtare, së cilës
i është kushtuar një shenjtërore në Sheshan të Shangait, ndërtesa më e madhe katolike
në Azinë Lindore. Dita e sotme botërore për lutjen në favor të Kishës në Kinë është
caktuar nga Ati i Shenjtë që në vitin 2007. Një vit më vonë Benedikti XVI shkroi një
lutje për Zojën e Sheshanit, pikërisht në këtë ditë. Edhe të mërkurën e kaluar, gjatë
audiencës së përgjithshme në Vatikan, Papa theksoi rëndësinë e kësaj nisme: “Kisha
në Kinë, sidomos në këtë çast, ka nevojë për lutjen e Kishës universale. Së pari,
ftoj të gjithë katolikët kinezë ta vazhdojnë e ta shtojnë lutjen, drejtuar sidomos
Shën Marisë, Virgjërës së fortë. Por edhe për të gjithë katolikët e botës, lutja për
Kishën që është në Kinë duhet të jetë impenjim i veçantë: ata besimtarë kanë të drejtë
për lutjen tonë, kanë nevojë për lutjen tonë”. Nga Veprat e Apostujve, shpjegoi
Ati i Shenjtë, dimë se kur shën Pjetri ishte në burg, të gjithë u lutën me shpirt
për të. Zoti i dëgjoi lutjet e dërgoi engjëllin e vet për ta liruar. Prandaj, shtoi
Papa, të lutemi për katolikët kinezë, duke qenë të sigurtë se lutja jonë do të shkojë
në vesh të Zotit: “Katolikët kinezë, siç kanë thënë shpesh, duan bashkimin me
Kishën universale, me Bariun më të lartë të saj, me Pasardhësin e Shën Pjetrit. Me
lutjen tonë mund të arrijmë që Zoti ta mbajë Kishën në Kinë një të vetme, shenjte
e katolike, besnike dhe të qëndrueshme në doktrinë e në disiplinën kishtare. Ajo e
meriton gjithë dashurinë tonë”. Papa nuk mungoi të kujtonte se në Kinë ka ipeshkvij
që vuajnë, nën presionet e regjimit komunist, i cili përpiqet të pengojë ushtrimin
e misionit të tyre. Ftesa e Benediktit XVI u pranua me dëshirë nga të gjithë katolikët
e mbarë botës, të cilët sot janë mbledhur në lutje drejtuar Hyjit, në kuadrin e nismave
të ndryshme për katolikët kinezë. U lutën sidomos të krishterët e Tokës Shenjte dhe
ata të Tajvanit. Po cili është kuptimi i kësaj lutjeje korale të krejt Kishës? Të
dëgjojmë sinologun (studiues i qytetërimit të Kinës) atë Anxhelo Laxaroto i Institutit
Papnor të Misioneve të Jashtme (PIME):
Është një kërkesë që Ati i Shenjtë
e ka bërë që vite më parë, prandaj, nuk i referohet dhe aq çastit, por ka vlerë më
të gjerë. Gjithsesi, është veçanërisht e rëndësishme sot, pas krizës së marrëdhënieve
të Kishës në Kinë me Kishën universale, në fund të vitit të kaluar. Akoma nuk është
sqaruar qëndrimi i autoriteteve, prandaj është një çast delikat ankthi për shumë katolikë.
Në lutjen e Papës për Virgjërën e Sheshanit u kërkohet katolikëve kinezë
të mbahen fort pas “shkëmbit të shën Pjetrit”. Është lutje për bashkim…
Natyrisht,
vetë Benedikti XVI, me rastin e kësaj dite maji, shkroi lutjen për Zojën e Sheshanit.
Papa shqetësohet që katolikët të mos jenë shkak ndarjeje, por të ndihmojnë bashkëjetesën
në harmoni. Në lutje kërkonte: “Jepu bijve të tu aftësinë për të kuptuar, në çdo situatë,
edhe në atë më të errtën, shenjat e pranisë plot dashuri të Zotit”, pra një çast besimi.
Që
prej një shekulli e gjysëm, Sheshani është vend tepër i rëndësishëm për Kishën në
Kinë. A mund të na thoni diçka për këtë shenjtërore mariane?
Sheshani
është një kodër e vogël, jo më shumë se 100 metra mbi nivelin e detit. Gjendet rreth
40 km në jugperëndim të Shangait. Që prej 150 vjetësh është vend shtegtimi e për të
mbërritur aty i duhet ngjitur kondrës përpjetë, duke kaluar nëpër Udhën e Kryqit.
Shenjtërorja, kushtuar Zojës Ndihmëtare, është ndërtuar në vitin 1871, ndërsa Bazilika
aktuale ka përfunduar shekullin e kaluar, në vitin 1935. Në epokën e Mao Ce Dunit,
sidomos gjatë Revolucionit Kulturor, u shkatërrua, si shumë kisha të tjera e, u hap
sërish vetëm në vitin 1981, duke u bërë shpejt vend shtegtimi edhe nga anë të tjera
të Kinës. Kohët e fundit, qeveria ka investuar për ta zhvilluar Sheshanin, si vend
turistik, duke penguar e madje duke ndaluar shtegtimet fetare. Edhe këtë vit, shtegtimet
janë të kufizuara, vetëm për dioqezën e Shangait, prandaj ka pasur vështirësi për
besimtarët e shumtë, që donin të shkonin në Sheshan.
Përshpirtëria mariane
i ka rrënjët e thella në Kinë, apo jo?
Po, ka edhe shenjtërore të tjera
në provinca të ndryshme, që frekuentohen shumë: ofrojnë çaste për përforcimin e fesë.
Është një përkushtim i përhapur e shumë i pranishëm: shën Maria konsiderohet Pajtorja,
Mbretëresha e Kinës.