Масавы зыход хрысціян з Лівіі

З часу пачатку ваеннага канфлікту ў Лівіі многія касцёлы апусцелі, бо хрысціяне імкліва пакідаюць гэту краіну. Так, у адным з храмаў горада Бенгазі, галоўнага цэнтра паўстанцкіх сілаў, з 1000 парафіян засталося толькі 40, паведамляе сайт "Christian Post".

Па словах пробашча гэтай супольнасці кс. Полы Ешака, хрысціян прымушае бегчы з краіны не страх перад ганенням і не рэжым Муамара Кадафі, а вайна. Святар заўважыў, што, нягледзячы на пераважна мусульманскае насельніцтва Лівіі, хрысціяне ў гэтай краіне заўсёды карысталіся свабодай веравызнання. Па словах каталіцкага біскупа Бенгазі Сільвестра Магро, перад вайной у яго дыяцэзіі на ўсходзе Лівіі жыло 10 тыс. католікаў, зараз іх засталося толькі некалькі сотняў.

Паводле апошніх дадзеных, прыкладна паўмільёна жыхароў Лівіі ўжо пакінулі межы краіны, уцякаючы ў Туніс, Егіпет і іншыя суседнія дзяржавы. Тым жа, хто застаўся ў Лівіі, прыходзіцца цярпець нягоды з-за пашкоджання інфраструктуры, спынення працы шматлікіх службаў і недахопу запасаў паліва, прадуктаў харчавання і медыкаментаў.