Vazhdojnë zërat mbi vrasjen ose zhdukjen e Mullah Omarit, udhëheqësi shpirtëror i
talebanëve në Afganistan, mik e shok me Osama Bin Ladenin. Sot paradite, qarkullonin
lajme mbi vrasjen e tij nga shërbimet sekrete në Pakistan, ndërsa largohej nga Quetta
drejt Vaziristanit verior. Mbërrin menjëherë përgënjeshtrimi i talebanëve pakistanezë,
por fillimisht dukej sikur shërbimet sekrete konfirmonin lajmin e vrasjes. Pas mesditës,
zëdhënësi i shërbimeve sekrete afgane sqaroi se Mullah Omari është zhdukur që prej
pesë ditësh, por nuk ka siguri për vrasjen e tij. Ndërkaq, së paku 13 ushtarë
humbën jetën gjatë një sulmi taleban kundër bazës aereodetare të Karaçit, pas 14 orë
beteje. Rreth 200 reparte speciale pakistaneze arritën të shuajnë ofensivën e terroristëve,
duke marrë kontrollin e bazës së madhe ushtarake, një nga më të rëndësishmet në vend.
Akoma nuk dihen humbjet e pësuara nga talebanët, të cilët kanë deklaruar se aksioni
është pjesë e hakmarrjes së premtuar pas vdekjes së Osama Bin Ladenit, më 2 maj.