Sot, në të dielën e pestë të Pashkëve, Kisha Katolike kujton edhe shën Ritën
nga Kasha, rregulltare agostiniane dhe shën Julien, virgjër e martire. O Zot Jezus,
sa herë shqetësimi i zemrës nuk na le ta shprehim thellë besimin tonë në Ty, që je
udha, e vërteta e jeta. Mbushi hapësirat boshe të vullnetit tonë me dëshirën për ta
njohur praninë tënde brenda nesh, tek të tjerët e tek ngjarjet që na rrethojnë.
Nesër,
më 23 maj, kremtojmë festën liturgjike të shën Gjon Baptist de Rosi, meshtar dhe
të shën Efebit Deziderio. Këta shenjtorë na mësojnë se në shkollën e Jezusit mësojmë
të duam deri në flijimin e vetvetes e provojmë përqafimin e përmallshëm të dashurisë
së Atit e të Birit.
Të martën, më 24 maj, Kisha Katolike kremton Zojën
Ndihmëtare. Asaj i drejtohen besimtarët me lutje e përgjërime, që të ndërhyjë pranë
Atit Qiellor për hallet e dertet e secilit. Kjo Zojë nderohet në shumë treva shqiptare,
ku Nënës së Krishtit i janë kushtuar kisha të lashta e të reja. Po në këtë ditë, përkujtohet
edhe shën Vinçenc Lerini e besimtarët katolike luten për Kishën në Kinë.
Më
25 maj, ditën e mërkurë, bie festa liturgjike e shën Bedës, meshtar benedektin
e Doktor i Kishës, e shën Marisë Madalenë de Paci, virgjër dhe e shën Gregorit VII,
papë. Ungjilli i ditës u tërheq vëmendjen të krishterëve që shkëputen nga Krishti.
Nuk janë më të zotë për asgjë. Nëse qëndrojmë të bashkuar me Krishtin, edhe sprovat
më të rënda të jetës japin fryte të mrekullueshme.
Shën Filip Neri, meshtar,
kremtohet të enjten, më 26 maj. Shenjti i oratoreve të Kishës, ku gjithnjë
janë mbledhur fëmijët për të mësuar e për t’u argëtuar, na jep shembullin e jetës
për çdo meshtar, që ka për detyrë punën delikate të edukimit të brezit të ri të krishterë.
Po këtë ditë, përkujtohen shën Eleuteri, papë, shën Lamberti i Vençes dhe shën Simetri,
martir.
Ditën e premte, 27 maj, Kisha Katolike kremton festën liturgjike
të shën Agustinit, kryeipeshkëv i Kanterburit, si edhe të shën Brunos Restituto. Ata
na thonë se nëse na qëllon ta humbasim identitetin e krishterë, duhet të kujtojmë
urdhërimin e Jezusit: duajeni njëri-tjetrin, ashtu siç ju kam dashur unë ju, deri
në flijimin e jetës.
Të shtunën, përkujtojmë shën Gjermanin, ipeshkëv
i Parisit, si edhe shën Emilianin apo Vilin, shën Ubaldeskën e të Lumen Maria Bartolomea
Banjezi. Kur shohim shenjtorët, që shpesh martirizohen, nuk mund të mos pyesim: “A
është e mundur, që ata, të cilët mbartin mesazhin ungjillor të dashurisë, të urrehehn
e të persekutohen? Është shumë e mundur madje! Mjafton të kujtojmë Krishtin. Atij
i përkasim e jo botës.
E diela e gjashtë e Pashkëve, më 29 maj, na kujton
edhe shenjtorët martirë anauniezë, tre murgj me origjinë nga Kapadokia – Sizini, Martiri
dhe Aleksandri – që u dërguan të ungjillëzonin luginat e Trentinos në Itali nga shën
Ambrozi. U martirizuan, por nderimi i tyre edhe sot bashkon Kishën e Lindjes me atë
të Perëndimit.