Pakistan: bashkësia e krishterë, në shënjestër të fondamentalistëve, pas vrasjes së
Bin Laden.
Të krishterët pakistanezë janë vënë në shënjestër të fanatikëve islamikë, pas vrasjes
së Osama Bin Laden. Sipas agjencisë AziaNjuz, alarmin e jep atë Akram Javed Gill,
famullitar i Abotabadit, qyteza ku u vra kreu i Al Kaedes. Meshtari pohon se jo vetëm
bashkësia katolike, por edhe bashkësitë e tjera të krishtera, janë pushtuar nga frika
aq, sa nuk guxojnë të dalin nga shtëpitë, ndërsa meshtarët e tyre janë detyruar të
heqin dorë deri nga vizitat baritore. Menjëherë pas vrasjes së terroristit, në kishën
famullitare të Shën Pjetrit, u organizua një takim me pjesëmarrje masive, ku u përcaktuan
masat e sigurimit dhe strategia për vijimin e jetës materiale e shpirtërore. Pastaj,
mbyllja në shtëpi. Edhe famullitari pohon se nuk ka guxuar të dalë nga streha për
disa ditë me radhë, ndërsa zilja e telefonit të tij nuk pushon për asnjë çast: 160
besimtarët katolikë kërkojnë këshilla e mbështetje, të bindur se mund të kthehen nga
çasti në çast në viktima të urrejtjes e të hakmarrjes së fondamentalistëve. Ndonëse
vendet e kultit janë vënë nën kontrollin e rreptë të policisë, pjesëmarrja në Meshë
është tepër e pakët, ndërsa familjet e krishtera, që banonin rreth vilës së Bin Ladenit,
i kanë braktisur shtëpitë e tyre. Popullsia është e bindur se sa herë që amerikanët
thonë ose bëjnë ndonjë gjë, të krishterët kthehen në shenjë pushke për integralistët.
Situata mbetet kritike, prandaj besimtarët luten e agjërojnë për paqen në zonë, por
pa guxuar të mblidhen as për të lexuar së bashku Biblën.