Imzot Ficxherald për takimet milaneze të “Katedrës së dialogut” për marrëdhëniet e
krishterimit me islamin.
Filluan këtë javë e do të vijojnë deri më 30 maj, takimet e “Katedrës së Dialogut”,
organizuar nga Shërbimi për ekumenizmin dhe dialogun i kryedioqezës së Milanos, në
bashkëpunim me qendrën kulturore protestante, bashkësinë e Shën Egjidit dhe Fondacionin
kulturor Shën Fedele. “Të afërt e të
largët. Kristianë e myslimanë ballë për ballë” është tema e ‘Katedrës së Dialogut’,
organizuar nga kryedioqeza e Milanos, në bashkëpunim me qendra e bashkësi të tjera.
Në tre takime, kryesuar nga islamisti Paolo Branka i Universitetit Katolik, u fol
kryesisht për bashkëpunimin fetar, përtej barrikadave ideologjike. Në takimin e parë,
imzot Ficxherald, nunc apostolik në Egjipt, ish-kryetar i Këshillit Papnor për dialogun
ndërfetar, preku temën e marrëdhënieve ndërmjet të krishterëve e myslimanëve, duke
u nisur nga përvoja e kohëve të fundit, thellësisht tragjike, që përjetoi bashkësia
e krishterë egjiptiane, e cila vijon të vajtojë njerëit e saj, që humbën jetën gjatë
konflikteve ndërfetare. Imzot Ficxherald shpjegoi se, edhe në Egjipt, është e domosdoshme
të rifillojë dialogu: “Përvojë e bukur ishte takimi i Kairos, ku dialoguan studentë
universitarë të krishterë e myslimanë, që u mblodhën me shumë vështirësi. Por, si
u mblodhën, gjetën gjuhën e përbashkët, miqësore, duke e kapërcyer frikën e takimit.
Rezultati ishte vërtet i kënaqshëm, ndonëse takime të kësaj natyre vijojnë të jenë
të jashtëzakonshme: duhen shumëfishuar, prandaj, e në të gjitha nivelet”. Nga
përvoja e fituar në një atmosferë tensioni, buron edhe ftesa për të vijuar rrugën
e ballafaqimit e të dialogut. Po ç’është themelore në këtë rrugë? “Besoj se
njohja e tjetrit: jo njohja e cekët, por e thellë e fesë, si e asaj të krishterë,
ashtu edhe asaj islamike. Besoj se kjo mund të ushqejë më shumë respekt ndërmjet besimtarëve
të të dy feve, e edhe bashkëpunim të mirëfilltë”. Imzot Ficxherald kujtoi,
pastaj, shpirtin që frymëzoi Takimet e Asizit, organizuar nga i Lumi Gjon Pali II,
si dhe Lutjen e madhe botërore për paqen, ngjarje të mëdha, në të cilat prelati mori
pjesë pak para se të vihej në krye të Këshillit Papnor për Dialogun Ndërfetar.