(19.01.2011 RV)Të dashur dëgjues, në emisionin e sotëm do të shqyrtojmë fjalën
“pastërti”, ose “pastri” dhe kuptimin që merr ajo për të krishterët.
Në
të gjitha fetë ndeshemi me një ndarje të qartë ndërmjet së shenjtes e paganes. Për
të kaluar nga paganizmi në tempullin e kultit hyjnor është i nevojshëm një pastrim,
që zakonisht bëhet me anë të ujit. Pra, kuptimi i “pastërtisë” ka për fenë natyrë
sakrale e nuk do të thotë thjesht “ i larë nga papastërtitë e ndyrësitë”, por i denjë
për të hyrë në tempullin e shenjtë të fesë. Domethënëse për këtë është reagimi i Isaisë
profet, i cili, kur dëgjon thirrjen e Zotit, pranohet para gjyqit qiellor dhe vetë
Hyjit e thotë: “I mjeri unë, qetash sharrova, sepse jam njeri me buzë të papastra,
banoj në popull buzësh të papastra” (6,5). Një engjëll e pastron, që ai të mund
të hyjë në tempullin qiellor e të gëzojë praninë e Zotit. Në Besëlidhjen e Vjetër
përshkruhet një legjislacion i ndërlikuar përsa i përket pastërtisë rituale. Pastria
shtrihet në kaq shumë fusha, sa të përkojë me gjithçka është pozitive. Kështu, edhe
ushqimi konsiderohet i pastër ose jo, duke pasur parasysh kafshët nga merret mishi
apo produktet e tjera, sipas kritereve arkaike e folklorike. Edhe njeriu mund
të bëhet i papastër. Në Besëlidhjen e Vjetër përshkruhet si papastërti e rëndë lebra,
apo gërbula. Aq është e vërtetë, sa i gërbuluri duhet të lajmërojë që nga larg gjendjen
e vet me fjalët e Levitikut: “I ndyri, i ndyri!” (Lev 13,45-46). Edhe aktet
seksuale, ose gjaku, duke qenë të lidhura me jetën, e cila konsiderohet e shenjtë,
krijojnë papastërti. Natyrisht, është e papastërt edhe kufoma e njeriut e prandaj
nuk mund të preket. Ky sistem i ndërlikuar rregullash për pastërtinë, shpesh i lidhur
me tabù të lashta, kushtëzonte jetën e besimtarit, duke përkufizuar përmasat brenda
të cilave ai mund të lëvizte. Në këtë mënyrë, pastërtia ishte një cilësi e jashtme,
e verifikueshme e nuk përkonte me pastërtinë e brendshme e morale. Risia, që solli
Krishti, e ndryshoi krejtësisht këtë mënyrë të menduari e të vepruari. Vërtet, Ai
kritikon ata që e kthejnë në mani, respektimin e rregullave e të traditave rituale,
duke harruar se ato janë vetëm mjeti për pastrimin e ndërgjegjes. Feja e vërtetë,
sipas Krishtit, shihet pikërisht në pastërtinë e zemrës e jo në atë të jashtme. Njeriun
e ndyn jo aq dukja e jashtme, por cilësitë e tij të brendshme, “mendimet e këqia”,
siç thotë Ungjilli (Mk 7,20.23). Jezusi arrin deri atje sa t’i prekë të gërbulurit,
duke marrë mbi vete papastërtinë e tyre, për t’i çliruar ata të mjerë nga vuajtjet.
Pastaj i fton të shkojnë e ta shpallin pastërtinë e fituar, në mënyrë që të ripranohen
në shoqëri e në jetën fetare e civile. Krishti i lë dishepujt të thyejnë norma të
ndryshme për pastërtinë e ushqimit, takohet e madje i lavdëron të huajt, që nuk mund
të merrnin pjesë në rite, pasi konsideroheshin jo të denjë, të papastër. Më vonë,
Kisha do të mësojë nga Shën Pjetri se “ç’ka Hyji e ka shpallur të pastër, nuk duhet
quajtur e ndytë”. Kapitulli X i Veprave të Apostujve është emblematik për këtë.
Aty përshkruhet vegimi simbolik i tryezës me ushqime të papastërta, në të cilën duhet
të ulet Shën Pjetri. Vetë Hyji, në vegim, e shtyn të shkojë për të ngrënë në shtëpinë
e kapitenit romak Korneli, i cili ishte kthyer në fenë e krishterë, megjithëse ishte
i huaj, pra “i papastërt”. Asnjë ushqim, “asgjë që hyn nga jashtë në njeriun,
nuk mund ta bëjë të papastër…, sepse nuk i hyn në zemër, por në bark… Çka del prej
njeriut, ajo e bën të papastër, sepse prej brendisë – prej zemrës së njeriut rrjedhin:
mendimet e këqija, llojet e ndryshme të fëlligështisë, vjedhjet, vrasjet, kurorëthyerjet,
dëshira e tepruar e pasurisë, mashtrimet, shfrenia, smira, blasfemitë, krenia, marrëzia”
(Mk 7,18-22). Kështu thotë Ungjilli i Krishtit.