17 мая кіраўнікі Каталіцкага
Касцёла, Лютэранскай і Праваслаўнай Цэркваў апублікавалі сумеснае паведамленне, у
якім выказалі свой пратэст у сувязі з магчымасцю ўвядзення матэрыяльнай кампенсацыі
з боку дзяржавы метада “in vitro”. “Немагчыма прымірыць з хрысціянскай этыкай зачацця
ў прабірцы”, - напісалі яны.
Кіраўнікі Касцёлаў выказалі сваю салідарнасць
з тымі шлюбнымі парамі, якія не могуць мець дзяцей, але, разам з тым адзначылі, што
“дапамога ім не можа перайсці мяжы павагі да жыцця і сям’і”.
На сённяшні дзень
у Літве не існуе закона, які б рэгуляваў працэс штучнага апладнення. Нядаўна ў Сейм
трапіў законапраект, які выключае донарства рэпрадуктыўных клетак, але дазваляе замарожванне
эмбрыёнаў. У краіне штучнае апладненне праводзіцца толькі ў прыватных клініках згодна
з дырэктывай Міністра аховы здароўя з 1999 г. Паводле яе апладненне метадам “in vitro”
можа быць прыменена толькі ў жанчын да 45 гадоў.