Në Romë, një konferencë për dyfishimin e përpjekjeve kundër trafikut të njerëzve
(17.05.2011 RV)“Të ndërtojmë ura lirie”: ky është titulli i Konferencës Ndërkombëtare
për zhdukjen e trafikut të qenieve njerëzore, që do të mbahet nesër në Romë. Takimi
është organizuar nga ambasada amerikane në Selinë e Shenjtë dhe nga Universiteti i
shën Tomës në Miami (Majemi) të SHBA-ve. Në këtë konferencë do të flasë edhe motër
Estrela Kastalone, koordinatore e rrjetit ndërkombëtar të jetës së shuguruar kundër
trafikut të qenieve njerëzore, “Talitha Kum”. Në mikrofonin tonë, ajo ndalet në punën
e murgeshave kundër formave të reja të skllavërisë. Ta dëgjojmë:
Jemi impenjuar
për parandalimin e këtij krimi, sidomos ndër gra e fëmijë. Kryesisht, sensibilizojmë
shoqërinë dhe denoncojmë trafikun. Jemi në kontakt të drejtpërdrejtë me disa viktima,
pasi në misionet tona, ne rregulltaret gjendemi në mesin e të gjitha llojeve të braktisjes,
të varfërisë dhe prekim me dorë vuajtjen e viktimave, të atyre që kanë mbi trup plagën
e kësaj skllavërie. Ne ofrojmë burimet, strukturat tona: spitalet, shkollat, jetimoret. Cili
është objektivi i parë i punës së organizatës “Talitha Kum”? Shpresojmë të ndikojmë
mbi shërimin e rihyrjen në jetë të viktimave të abuzimeve e të dhunës. Kanë pësuar
dhunë fizike, mendore, seksuale, kërcënime me vdekje e janë shkatërruar krejtësisht.
Rruga e shërimit dhe e rifitimit të dinjitetit është shumë e vështirë. Është i nevojshëm
një rrjet shumësektorial për t’i kuptuar ndërlikimet e trafikut të njerëzve, sepse
flitet gjithnjë vetëm për prostitucionin, por ka edhe shumë forma të tjera. Veçanërisht,
fëmijët përdoren edhe për luftë, punë të detyruar, si “skllevër në shtëpi” e madje,
edhe shiten vetëm për t’i hedhur pastaj në tregun e lypësve. Sipas jush, ç’nevojitet
për luftën kundër trafikut të qenieve njerëzore? Nevojitet një rrjet për ndërhyrje
të përcaktuara mirë, duke filluar nga legjislacioni, nga organizimi e tek bashkimi,
në mënyrë që për këtë të përdoren të gjitha energjitë e burimet në dispozicion.