Në Montevideo, Mesha me të cilën u hap asambleja e Celam. Intervistë me kardinalin
Ojè.
(17.05.2011 RV)Me një Meshë, kremtuar dje në katedralen e Montevideos, kryesuar
nga prefekti i Kongregatës për Ipeshkvijtë dhe i Komisionit Papnor për Amerikën Latine,
kardinali Mark Ojè, u hap asambleja e 33-të e përgjithshme e Celam (Këshilli ipeshkvnor
latino-amerikan). Kisha në Amerikën Latine jeton një çast pozitiv, ndonëse duhet
të thellojë vetëdijen se nuk janë ideologjitë, ato që i japin vendit shtytjen përpara
e se të krishterët duhet ta çojnë Lajmin e mirë të Ungjillit të Jezu Krishtit në jetën
publike. E pohoi edhe kardinali Ojé, në konferencën e shtypit, pas Meshës përuruese,
me të cilën u hapën punimet e Asamblesë së 33 -të të Këshillit Ipeshkvnor latino-amerikan
në katedralen e Montevideos. Prefekti i Kongregatës për Ipeshkvijtë pranoi se
kohët e fundit përqindja e katolikëve është më e ulët, por theksoi edhe se një situatë
e tillë po ndryshon, falë misionit kontinental, që nisi tri vjet më parë, pas Konferencës
së Aparesidës, mbajtur në Brazil, më 2007. E pikërisht ky mision ishte edhe temë kryesore
e homelisë së kremtimit eukaristik përurues, mbajtur në kornizën e katedrales, ku
ruhen reliket e Shërbëtorit të Zotit, Gjaçinto Vera, ipeshkëv i parë i vendit dhe
uruguajaneve Dolores e Konsuelo Aguiar, martire të luftës civile spanjolle, lumnuar
nga Gjon Pali II në vitin 2001. Kardinali Mark Ojé, në mikrofonin e Radio
Vatikanit, flet pikërisht për rëndësinë e këtij takimi të Celamit, në Uruguaj:
Përgjigje:
- Ka unitet ndërmjet ipeshkvijve, përsa munda të konstatoj, e është, pastaj
edhe projekti i madh i misionit kontinental, që po shkon përpara, që nga viti 2007,
duke nisur menjëherë pas Asamblesë së Aparesidës. Dua t’i ikurajoj ipeshkvijtë të
vijojnë ecjen në këtë rrugë, sepse ky projekt i madh, ky mision kontinental, është
pasuri e madhe për Amerikën Latine e për mbarë Kishën.
Pyetje: -
Ç’mendim keni për Kishën latino-amerikane?
Përgjigje: - Ka
entuziazëm, e ka edhe perspektivë shumë pozitive dhe vërtet ungjillëzuese. Nuk harrohet
as përmasa shoqërore, por gjithnjë duke u nisur nga Ungjilli, duke pasur mirë parasysh,
së pari, formimin e dishepujve, që duhet të jenë njëkohësisht, edhe misionarë. Idetë
e mëdha të Aparesidës, kanë depërtuar thellësisht në vetëdijen e ipeshkvijve, duke
çuar përpara një sërë projektesh. Tani, edhe në sajë të nxitjes apostolike “Verbum
Domini” (Fjala e Zotit), kremtimit të lectio divina, të Fjalës së Zotit, medituar
së bashku: e gjithë kjo, premton shumë për të ardhmen.