Pas 30 vjetësh, dy libra hulumtojnë atentatin kundër Papës Vojtila.
(15.05.2011 RV)Në prag të 30 vjetorit të atentatit kundër Papës Gjon Pali II
në Sheshin e Shën Pjetrit, më 13 maj 1981, dy libra, që dolën kohët e fundit në Itali,
rindërtojnë, në mënyra të ndryshme, intrigën e një ngjarjeje tejet të ndërlikuar në
këndvështrimin juridik ndërkombëtar. Vëllimi i parë që po ju paraqesim, është shkruar
nga dy gazetarë: Marko Ansaldo, vatikanist i së përditshmes “La Repubblica” dhe Jasemin
Tashkin, korrispondente në Itali, e gazetës turke “Sabah”. Titullohet “Vriteni
Papën! – e vërteta mbi atentatin e Gjon Palit II”. Tezat e tyre mbështesin mendimin
se atësia e atentatit nuk duhet kërkuar në mjediset e ish-regjimit sovjetik të asokohshëm,
në të ashtuquajturën pistë bullgare, por në të duhet parë dora e lëvizjes eversive
turke “Ujqërit gri”, në të cilën militonte atentatori, Ali Agça. Folëm me autorin
e njërit nga librat, Marko Ansaldo:
Përgjigje: - Që
prej 20 vjetësh punojmë për librin tonë, në kuptimin se sidomos Jasemin e ka takuar
personalisht atentatorin, me që është gazetare turke. Lidhja, e vijuar në mënyrë të
veçantë vitin e fundit, që kur atentatori u lirua e u rikthye në Turqi, shquhet për
frymën e mirëbesimit. E takuam sy për sy tri herë e, natyrisht, u përpoqëm të kuptojmë
cila është e vërteta. Në një farë pike, ai na tha se të gjitha hamendjet, të gjitha
rrugët, që u ndoqën deri më sot, janë krejt të kota, sepse atentati ka qenë një veprim
shumë i thjeshtë, që u bë i ndërlikuar vetëm nga ndërhyrja e shumë shërbimeve sekrete
ndërkombëtare. Prej këndej, mund të themi se vërtet ishte kompllot, por sipas kërkimeve
tona e sipas dokumenteve, që botohen në librin “Vriteni Papën!”, ky ishte kompllot
i organizuar dhe i zbatuar nga “Ujqërit gri”, një lukuni, ulurima e kobshme e së
cilës, asokohe, ndjehej fort në Turqi.
Pyetje: - E cili është shkaku,
që i shtyu Ujqërit Gri ta kryejnë këtë krim kundër Papës?
Përgjigje:
- “Ujqërit gri” u përdorën si dorërasë, po gërgasi ishte regjimi i asokoshëm
ushtarak, që sundonte Turqinë në vitet 1979-’80, i mirënjohur për akte kundër rendit,
çregullime në sheshe, vrasje: ishin vitet e plumbit për Turqinë. Ushtarakët krijuan
atmosferën, që u duhej, për të realizuar grushtin e shtetit, puçin e vitit 1980: por
duhet kujtuar se, kur e morën pushtetin, ujqërit gri nuk iu deshën më. I shpërndanë,
prandaj. E ata u detyruan të iknin. U vendosën sidomos në Francë, në Gjermani e në
Austri e që këtu, domethënë nga Austria, u riorganizuan për t’u hakmarrë kundër regjimit
ushtarak e për t’i treguar ç’ishin të zotët të bënin. Në këtë pikë nisën të mendonin
për një sërë objektivash të nivelit të lartë ndërkombëtar, si Mbretëresha e Anglisë,
Thaçer, Brezhnjevi, Kurt Valdhaim, Sekretar i Përgjithshëm i Kombeve të Bashkuara,
kryetarja e Parlamentit Evropian, Simone Weil. Ndërmjet këtyre njerëzve, që u vunë
në shënjestër, ishte edhe Papa, të cilin atentatori e kishte kërcënuar me fjalë, para
se t’i drejtonte armën. Kur Ati i Shenjtë ishte, më 1979, në Turqi për vizitë baritore,
një farë Ali Agçai i dërgoi një letër gazetës “Milet”, përmes së cilës shprehej hapur:
“Do ta vras Papën, kreun e të krishterëve”. Nuk e bëri në këtë rast, por një vit më
vonë, në Sheshin e Shën Pjetrit.
Ilario Martela, gjykatës në Prokurorinë
e Romës, që ndoqi hetimet për atentatin, është autori i librit tjetër, titulluar “13
maj ‘81. Tri të shtëna kundër Papës”, botuar nga Ponte alle Grazie. Vëllimi, duke
u nisur nga analiza e akteve gjyqësore, fuqizon të ashtuquajturën ‘hamendje bullgare’,
sipas së cilës disa shërbime sekrete të Evropës Lindore patën rolin kryesor në organizimin
e atentatit. Kështu theksohet mendimi se Ali Agça nuk ishte i vetmi, që qëlloi
Papën pasditen e 13 majit 1981. Në librin-hetim, gjykatësi Ilario Martela përpiqet
të sqarojë të vërtetën mbi atentatin, duke u mbështetur dhe mbi analizat, videot dhe
fotografitë, përmes të cilave dëshmon se drejt Papës u nisën tre plumba, që dolën
nga gryka e dy revolverave: ta dëgjojmë vetë autorin, Ilario Martela:
“Tri
të shtëna – nuk ka asnjë dyshim se ishte pikërisht kështu- sepse kemi një dokument
kinematografik, që vërteton se Agçai shtiu dy herë, prej këndej, plumbi i tretë u
nis nga arma e bashkëpunëtorit të tij, Oral Çelik. Nga ana tjetër, një dëshmitar amerikan
e pa bashkëpunëtorin e Agçait, duke ikur me vrap nga vendi i krimit. E shkrova këtë
libër për të zbuluar të vërtetën. E e vërteta është se duart, që shtinë mbi Papën,
ishin të dy ujqërve turq, po plumbat kishin markën turko-bullgare".
Hamendja
nisi nga disa pohime të vetë Agçait, të ngatërruara, ndoshta, edhe me qëllim, e nga
disa të tjera, që përkonin plotësisht me faktet, aq sa ta shtynin gjykatësin Martela
të nxjerrë para gjyqit katër nënshtetas turq dhe tre nënshtetas bullgarë, të cilët,
pastaj, u liruan, për mungesë provash. Ngjarja, në vijim, u mbulua me heshtje të thellë
nga institucionet përkatëse të përtej perdes së hekurt. Këto ngjarje të shtyjnë të
mendosh se veprimet e Ali Agçait vijonë të jenë ende të pazbuluara e se gjithçka thuhet,
është nën sekret ndërkombëtar, që mund të dalë vetëm kur të ftohen gjakrat. Të
dëgjojmë Xhan Franko Sviderkoskin, gazetar e vatikanist:
“Siç pati
përshpejtuar Papa Vojtila në librin e tij të fundit “Kujtesë e identitet”, Ali Agçai
ishte kriminel i paguar, pas të cilit fshihej vrasësi i vërtetë. Problemi është të
zbulohet kush ishte ky vrasës? Mendoj se mbetet ende në këmbë, i mbështetur pastaj
tërthorazi nga Papa, e edhe më fort nga kardinali Dxhivish, fakti se atentati duhet
të jetë gatuar në kuzhinat kriminale të shërbimeve sekrete të Evropës Lindore, madje
ka shumë mundësi që në të të jetë gishti i Kgb-së ruse. Aletatët sovjetikë ishin ustallarë
të mëdhenj krimesh, prandaj ia dolën mbanësh të hedhin gurin e ta fshehin mirë dorën!".
Por, megjithatë, më pas, shumëkush e pa të qartë këtë dorë në ngjarjen
e 13 majit 1981, në Sheshin e Shën Pjetrit, në Vatikan ku, megjithatë, asnjë sigurim
në botë nuk mundi ta ndalojë Dorën misterioze, që e dredhoi plumbin, duke ia ruajtur
jetën Gjon Palit II.