U botua Udhëzimi “Universæ Ecclesiæ”, për zbatimin e “Summorum Pontificum” mbi liturgjinë.
(13.05.2011 RV)Sot Komisioni Papnor ‘Ecclesia Dei” botoi Udhëzimin “Universæ
Ecclesiæ”. Sipas njoftimit, Udhëzuesi ka për qëllim të disiplinojë zbatimin e Letrës
Apostolike në formë Motu Proprio “Summorum Pontificum” mbi liturgjinë parakonciliare,
duke e pajisur Kishën me një sërë normash, për të rregulluar kremtimin e Meshës në
gjuhën latine, sipas ritit në fuqi qysh nga viti 1962, që edhe sot e kësaj dite shikohet
si pasuri e liturgjisë romake. Famullitarët dhe meshtarët porositen t’u përgjigjen
kërkesave të besimtarëve, që dëshirojnë ta ndjekin Meshën sipas ritit të lashtë të
Shën Piut V, duke u pajisur me të gjitha udhëzimet e nevojshme për këtë kremtim. Natyrisht,
një rikthim në kremtimin e Meshës në gjuhën latine, kërkon që meshtarët ta studiojnë
e ta zotërojnë mirë këtë gjuhë që, në fund të fundit, ka qenë e është gjithnjë gjuhë
kryesore e Kishës Katolike. Kujtojmë se të hënën, më 16 maj, gjithnjë Salla e
Shtypit, do të botojë një Letër Qarkore të Kongregatës për Doktrinën e Fesë, shkruar
për të ndihmuar konferencat ipeshkvnore në përgatitjen e vijave udhëheqëse për trajtimin
e rasteve të shpërdorimeve seksuale të të miturve, nga ana e anëtarëve të klerit.