Հայ Երիտասարդաց Ընկերակցութեան՝ ( ՀԵԸ-ի) 80-ամեակի Նշում, Լիբանան:
Կիրակի, 8 մայիսի երեկոյեան, հանդիսաւոր կերպով նշուեցաւ Հայ երիտասարդաց ընկերակցութեան
հիմնադրութեան 80-ամեակը (1931-2011)` ՀԲԸՄ-ի մարզադաշտին վրայ: Այս առթիւ ՀԲԸՄ-ի փոխ
նախագահ, ՀԵԸ-ի ատենապետ` Կարօ Ճըղըլեան խօսք առնելով վեր առաւ ՀԲԸՄ-ի ու յատկապէս`
ՀԵԸ-ի 80-ամեայ հիմնական իրագործումները: Ան բարձր գնահատեց կատարուած ու կատարուող ճիգերը`
ընդգծելով, որ անոնք ի սպաս են հայրենիքի ու հայութեան յառաջդիմութեան: Ճըղըլեան այս
առիթով կոչ ուղղեց գործակցութեան` միասնաբար պայքարելու համար հայութեան սպառնացող վտանգներուն
դէմ: Ան նաեւ կոչ ուղղեց միշտ վառ պահելու ջահը, զօրակցելու Հայաստանին ու Լիբանանին:
Ապա ներկայացուեցաւ գեղարուեստական յայտագիր, ուր անջատ ելոյթներ ունեցան սկաուտական
միաւորները, պարախումբը եւ ՀԲԸՄ-ի վարժարաններու աշակերտները: Վերջին բաժինով ներկայացուեցաւ
ՀԲԸՄ-ի պատմութիւնը ներկայացնող սահիկներու արխիւային ցուցադրութիւն` պատրաստութեամբ
բեմադրիչ Վարդան Մկրտիչեանի: