Papa B’nai B’rith International: hebrenj e të krishterë, për një botë më të mirë!
(12.05.2011 RV)Hebrenj e të krishterë mund të kontribuojnë së bashku për të
mirën e njerëzimit e t’i përgjigjen sfidave të shoqërisë aktuale. Këtë pohoi Benedikti
XVI, duke takuar, sot paradite, një delegacion të B’nai B’rith International, organizatë
hebraike, themeluar në Nju Jork, në vitin 1843, që lufton, kryesisht, kundër racizmit
e antisemitizmit: "There are many ways in wich Jews and Christians can cooperate…"
Të shumta janë udhët e bashkëpunimit ndërmjet hebrenjve e të krishterëve, për ndërtimin
e një bote më të drejtë, në përkim me vullnetin e Zotit, për të mirën e mbarë njerëzimit.
Mendja të shkon menjëherë tek veprimtaritë konkrete të dashurisë e të shërbimit ndaj
të varfërve, por një nga gjërat kryesore, që hebrenjtë e të krishterët mund ta bëjnë
së bashku, është të japin dëshminë e njëzëshme të fesë, me bindjen se çdo burrë e
çdo grua janë krijuar sipas shembëllytyrës së Zotit e prej këndej, kanë dinjitet të
pacënueshëm”. "This conviction remains the most secure basis…" Kjo bindje
mbetet themeli më i sigurtë për impenjimin e të gjithëve në mbrojtjen e në promovimin
e të drejtave të njeriut. Në vijim, duke kujtuar takimin e Komitetit Ndërkombëtar
të Lidhjes së katolikëve me hebrenjtë, mbajtur nga fundi i shkurtit, në Paris, Papa
nënvizoi se u pohua dëshira e të dyja palëve për të bashkuar përpjekjet e për të përballuar
së bashku sfidat e pafundme të një bote, që ndryshon me shpejtësi të rrufeshme,
si dhe detyrën fetare të luftës kundër varfërisë, padrejtësisë, diskriminimit e mohimit
të të drejtave universale. Ati i Shenjtë kujtoi edhe se në një takim të kohëve të
fundit, mbajtur në mars, në Jeruzalem, me pjesëmarrjen e delegacionit të Rabinatit
të Madh të Izraelit dhe të Komisionit të Selisë së Shenjtë për marrëdhëniet ndërfetare
me hebraizmin, theksi u vu mbi nevojën e thellimit të mirëkuptimit, lidhur me rolin
që mund të luajë feja në jetën e shoqërive bashkëkohore, me bindjen se feja është
e aftë të korrigjojë vizionin pastërtisht horizontal, pa Zot, e, si pasojë, të papërsosur,
të njeriut e të bashkëjetesës. Ati i Shenjtë i ftoi të pranishmit të punojnë për
kapërcimin e këtij vizioni material e për rizgjimin e jetës shpirtërore të njeriut”. "The
life and work of all believers should bear constant witness…" Besimtarët, me
jetën e punën e tyre, duhet të japin dëshmi të përhershme të besimit në Zotin, të
mbështeten mbi realitetet e padukshme, që janë jashtë nesh e të mishërojnë bindjen
se mbi ne është një Provani e mëshirshme, në duart e së cilës janë fatet tona e të
historisë sonë. Prandaj nuk është për t’u trembur, sado e vështirë e kërcënuese të
duket rruga, në të cilën ecën njeriu. Zoti, duke folur me gojën e Jeremisë Profet,
na siguron: “Unë i njoh mirë planet, që kam bërë për ju; plane paqeje, jo mjerimi,
për t’ju siguruar një ardhmëri plot me shpresë”.