Zëdhënësi i Kishës në Egjipt: Islami radikal e mbyt revolucionin
“Egjipti është në fillim të luftës civile. E kjo për shkak të grupeve të vogla ekstremistësh
islamikë, që mbysin idealet e Revolucionit të jaseminëve, duke nxitur dhunën në pjesën
më të madhe të vendit”. Kështu flet për agjensinë misionare AsiaNjuz, kreu i zyrës
së shtypit të Kishës Katolike egjiptiane, atë Rafik Greike, zëdhënës i shtatë denominacioneve
katolike të vendit. Pas ndeshjeve ndërmjet myslimanëve e të krishterëve në natën e
së shtunës e pasi ushtria është në gatishmëri për të shmangur dhunën, meshtari i bën
thirrje bashkësisë ndërkombëtare të mbështesë qeverinë e udhëhequr nga ushtarakët,
që ajo të mbrojë të gjithë egjiptianët, pa dallim, nga ardhja e një regjimi islamist. “Gjendja
është shumë kritike – thekson atë Greike. Qeveria e ushtarakëve është tepër e dobët
dhe ka frikë nga grupet ekstremiste islamike, si salafitët, që duan të krijojnë kaos
e çrregullime kudo”. Të krishterët që u ndeshën të shtunën me myslimanët ishin koptë
ortodoksë, por meshtari vëren se edhe koptët katolikë janë në rrezik, megjithëse deri
tani, nuk është sulmuar asnjë kishë katolike. Madje prifti ortodoks i kishës së Shën
Minait, së cilës iu vu flaka nga myslimanët, gjeti strehim në kishën e afërt katolike.
“Gjatë ndeshjeve – pohon atë Greike – salafitët u hakmorrën për këtë dhe vranë nipin
16-vjeçar të ipeshkvit katolik lokal”.