Ռըմէյլի Ս. Յարութիւն Եկեղեցւոյ Անուանակոչութեան Օրուան Նշում-Լիբանան:
Ռըմէյլի Ս. Յարութիւն եկեղեցւոյ անուանակոչութեան օրը նշուեցաւ, կիրակի, 8 մայիսին :
Պատարագը մատուցեց եւ հաւատացեալներուն իր պատգամը փոխանցեց Լիբանանի հայոց թեմի առաջնորդ
Գեղամ արք. Խաչերեան: Ան նկատել տուաւ, որ բանի մը կրկնութիւնը ձանձրանալի կը դառնայ,
սակայն երբ իմաստ եւ կարեւորութիւն ունեցող դէպք մը կամ իրականութիւն մը կը կրկնենք,
չենք ձանձրանար` աւելցնելով, որ Քրիստոսի յարութեան աւետիսը քրիստոնեային համար մեծագոյն
աւետիսն է: Ակնարկելով սոյն օրուան Աշխարհամատրան կիրակի կոչուելուն` առաջնորդ սրբազանը
բացատրեց անոր իմաստը, թէ աշակերտները Քրիստոսի համբարձումէն ետք կը հաւաքուէին տեղ մը,
եւ այդ տեղը եղաւ առաջին եկեղեցին, որ կոչուեցաւ աշխարհամատուռ: «Յարութիւնը կեանքը
նորոգեց» շեշտեց առաջնորդ սրբազանը` աւելցնելով, որ մարդը սկսաւ ապրիլ նոր կեանք մը,
որուն մէջ մահ գոյութիւն չունէր: «Այսօր առաջին եկեղեցւոյ տօնն է», շեշտեց առաջնորդ սրբազանը`
աւելցնելով, որ ներկայիս եկեղեցական իշխանութիւնը ժողովուրդի քրիստոնէական հաւատքի կեանքը
կառավարելու, կազմակերպելու, առաջնորդելու գործը կ՛ընէ: Եզրափակելով իր խօսքը` Գեղամ
արք. Խաչերեան հաստատեց, որ եթէ հայ եկեղեցին ամուր շաղախ եւ կառոյց է, ապա այդ մէկը
իր հաւատացեալներուն եւ ոչ թէ շէնքին շնորհիւ է: «Եթէ եկեղեցւոյ իմաստը, պատմութիւնը,
դաստիարակութիւնը հեռացնենք նոր սերունդէն, ապա կը փլի այդ եկեղեցին», ընդգծեց առաջնորդ
սրբազանը: Պատարագի աւարտին կատարուեցաւ մատաղօրհնէք