9 Մայիս՝ Կը Յիշատակենք Շուշիի Ազատագրութեան 19-ամեակը ։
Ազատագրուած օրէն ի վեր Շուշին իբրեւ քաղաք ու ապրող բնակչութիւն բացարձակապէս մնացած
է նոյնը: Ի հարկէ որոշակի առումով ծաղկած է հոգեւոր ու մշակութային կեանքը, ծաւալած է
շինարարութիւնը, կազմակերպուած են պետական կառոյցներն ու ենթակառոյցները եւ արձանագրուած
է բնակչութեան աճ: Խնդիրը ակնկալուած արդիւնքէն տակաւին հեռու մնալն է, զարգացման աշխատանքներուն
պէտք եղած թափի հաղորդման պակասն է: «Պէտք է»ներու շարքը անհարկի է անշուշտ: Կը բաւէ
վերստին յիշել քաղաքին ներկայացուցած ռազմավարական կարեւորութիւնը, համոզուելու համար
որ մեր հայրենիքի անվտանգութեան պահպանման համար որքա՛ն կարեւոր է Շուշիի բերդին անառիկութիւնը: Նկատառելի
բնակեցում կամ առեւտրական ու ճարտարարուեստական քաղաք ակնկալելը եւ պահանջներուն առաստաղը
բարձրացնելը իրատեսական չի թուիր: Մշակութային կեդրոնի վերածելու առաջադրանքը սակայն,
որ կը վայելէր պետական հովանաւորութիւն եւ համապատասխան կառոյցներու աջակցութիւն, տակաւին
յայտարարուած առաջադրանքի տարողութեան առարկայացումը չէ գտած քաղաքին մէջ: Եղանակային
եռուզեռներ կազմակերպելը սակայն` մշակութային փառատօներու, համահայկական համաժողովներու,
երիտասարդական բանակումներու, մարզական մրցաշարքերու ճամբով կենդանութիւն կ՛ապահովեն
քաղաքին: Այս միջոցառումները ինքնին պետական հովանաւորութիւն կ՛ենթադրեն. անոնց իրականացման
համար համապատասխան ծառայութիւններու եւ դիւրութիւններու կարիքը ինքզինք զգալի կը դարձնէ:
Ի վերջոյ համահայկական միջավայրեր ստեղծելու համար անհրաժեշտ են համաժողովներու սրահներ,
պանդոկներ, մարզադաշտեր եւ նման ենթակառոյցներ, որոնց շինարարութիւնը արդէն նոր գործատեղերու
եւ աշխատուժի պահանջ կը դնէ: Հայաստան – Լեռնային Ղարաբաղ – Սփիւռք եռամիասնութեան
առարկայացման յարմարագոյն վայրերէն մէկը Շուշին կարելի է համարել: Յառաջիկայ տարին ազգովին
պիտի նշենք Շուշիի ազատագրութեան 20-ամեակը: Անիկա կրնայ վերածուիլ լաւագոյն առիթի` Շուշին
իբրեւ համահայկական կեդրոնատեղի նկատի ունենալու եւ ըստ այնմ նախապատրաստուելու: 20-ամեակը
պարզապէս կրնայ գործնական մեկնարկի ծառայել՝ համահայկական եղանակային եռուզեռներ կազմակերպելու
համար: Համահայկական հովանոցը ընդմիշտ պէտք է բաց պահել այս քաղաքին վերեւ: Անոր ազատագրումը
եւս համահայկական ուժերով էր, որ իրականացաւ: Շուշին բերդն է Արցախին, Արցախը իր կարգին`
Հայաստանի Հանրապետութեան: Բերդին անառիկութեան պահպանումը հաւասարապէս բոլորիս
պարտականութիւնն է: