Liturgjia e Fjalës së Zotit e dielës së 3-të të Pashkëve ‘A’
Ja përsëri në takimin tonë javor të së shtunës me Fjalën e Zotit të së dielës, kësaj
rradhe do të dëgjojmë e meditojmë së bashku leximet biblike të liturgjisë së Fjalës
Hynjore të dielës së 3-të të Kohës së Pashkëve, ciklit të parë, sipas kalendarit liturgjik
të Kishës. Feja pashkore gjenë ushqimin e vet e zhvillimin e vet në bashkësinë
e besimtarëve të mbledhur nga Shpirti për kremtimin e Eukaristisë, do të thotë të
lavdërimit të Zotit, duke hapur zemrat për dëgjimin e Fjalës e ndarjen së bashku të
Bukës së jetës. Leximi i parë nga Veprat e Apostujve na ofron dëshmin e
parë të Pjetrit. Pasi ka marr Shpirtin Shenjt, Pjetri, shpjegon para njerëzve të Izraelit
domethënien e ngjarjeve pashkore të Krishtit. Leximi i dytë nga Letra e
Parë e Pjetrit na ofron dëshmin e dytë të Pjetrit. Mëson ti shohim veprat e mëdha
të Zotit të realizuara në Jezu Krishtin e vdekur e ngjallur, e po nga këto të nxjerrim
mësim për jetën e krishterë. Pjesa e Ungjillit nga Luka na tregon ngjarjen
e Emausit duke na mësuar ta njohim Krishtin të pranishëm në mesin e të vetëve, të
mbledhur në ditën e parë të javës, që shpjegon shkrimet dhe dëftohet në aktin e ndarjes
të bukës. Më hollësisht mund të dëgjoni emisionin e sotëm. Duhet të përjetojmë
çdo të dielë përvojën e Pashkëve! Ngjarja e dishepujve të Emausit që ndodh në ditën
e parë të javës, na sugjeron se ajo që ka ndodhur mbrëmjen e Pashkëve vazhdon të ndodhë
çdo të dielë gjatë Eukaristisë. Pikërisht këtu mund të ndjejmë praninë e Jezusit dhe
shoqërinë e tij në udhëtimin tonë: Ai ngroh zemrën tonë me Fjalën e tij, na shndërron
në dëshmitarë entuziastë e na dërgon në mision. Të dielën e Pashkëve dy dishepuj
të Jezusit largohen nga Jeruzalemi të zhgënjyer dhe të hidhëruar për kryqëzimin e
Mësuesit të tyre. Kthehen plot me gëzim duke sjellë lajmin e ringjalljes. Mes këtyre
dy çasteve tregohet ecja e tyre, gjatë së cilës Jezusi u bashkohet atyre pa u bërë
i njohur, dhe darka në Emaus në të cilën sytë e tyre hapen ndaj të Ngjallurit. Në
këtë ditë, ditën e Zotit, Krishti i Ngjallur hap zemrat e tyre ndaj inteligjencës
së Shkrimeve dhe ndan Bukën eukaristike, u ridhuron atyre shpresën e ringjalljes së
tij dhe shfaqet si dritë që shkëlqen rrugët e trishtimit. I Ngjalluri është ai
që zgjidh dyshimet e dhimbshme dhe mbush boshllëkun e jetës sonë. Ai është Mësuesi
që na bën të kuptojmë Shkrimet e Shenjta, dhe Meshtari i madh që thyen për ne bukën
e jetës dhe na dhuron Shpirtin e tij, që të mund ta njohim çdo herë që kremtojmë meshën
e shenjtë. Nga ana jonë mbi të gjitha në momentet e errësirës dhe të krizës së
besimit duhet ta zbulojmë Zotin që ec gjithmonë me ne.
Leximi i parë (Vap
2, 14.22-23) Pjesa paraqet dëshminë e parë që apostujt i japin Krishtit, pasi
kishin marrë nga Ai, dhuratën e Shpirtit Shenjt. Të dëshmosh dhe të shpallësh atë
që ka ndodhur në personin e Jezusit nuk do të thotë të bësh një reportazh, por tu
japësh atyre fakteve kuptimin nën dritën e Shkrimeve. Për këtë Jezusi është me të
vërtetë Zoti dhe Mesia, pra Shpëtimtari i premtuar nga Hyji.
Lexim prej
Veprave të Apostujve
Ditën e Rrëshajëve Pjetri bashkë me të njëmbëdhjetët
u çua në këmbë, e ngriti zërin dhe tha: “Burra judeas dhe ju të gjithë që banoni në
Jerusalem, mirë ta dini këtë gjë e me kujdes dëgjoni fjalët e mia! Burra të Izraelit,
dëgjoni këto fjalë: Jezusin Nazarenas njeri që Hyji e përforcoi para jush me vepra
të madhërueshme, me mrekulli dhe me shenja, që siç e dini, me anë të tij i bëri ndër
ju këtë, të tradhtuar sipas vullnetit të caktuar dhe parapamjes së Hyjit, ju e kryqëzuat
dhe e vratë me duar të të pafeve. Por Hyji e ngjalli duke e shpëtuar nga tmerri i
vdekjes, sepse s’ishte e mundur që vdekja ta mbante nën sundimin e vet. E njëmend,
për të Davidi thotë: ‘Zotërinë e kam gjithmonë para sysh, sepse Ai më rri në anë të
djathtë që të mos rrëzohem. Prandaj galdon zemra ime dhe brohorit gjuha ime, po dhe
trupi im do të pushojë me shpresë, sepse Ti nuk do ta lësh shpirtin tim në nëntokë
as s’do të lejosh që Shenjti yt të kalbet. Ti ma tregove udhën që shpie në jetë: në
praninë tënde do të më mbushësh me gëzime.’ Vëllezër, më lejoni t’jua them haptas:
Davidi patriark vdiq, u varros dhe varri i tij është edhe sot e kësaj dite ndër ne.
Por ai, mbasi ishte profet dhe mbasi e dinte se Hyji iu përbetua me betimin se një
nga pasardhësit e tij do të hypte në fronin e tij, qysh më parë e parapau dhe paralajmëroi
ngjalljen e Krishtit, kur tha: ‘Nuk qe lënë në nëntokë as trupi i tij nuk e provoi
kalbësimin.’ Po këtë Jezus Hyji e ngjalli! Të gjithë ne e dëshmojmë këtë gjë!
E djathta e Hyjit, pra, e lartësoi, prej Atit e mori premtimin, Shpirtin Shenjt, dhe
e ndikoi ashtu siç po shihni e po dëgjoni edhe ju vetë. Fjala e Zotit !
Psalmi
16 (15) Ref: Na e trego, o Zot, udhën e jetës. ______________ Më
ruaj, o Hyj, sepse të kam rënë ndore! I thashë Zotit: “Ti je Zoti im, tjetër
të mirë nuk kam veç teje”! Zoti është pjesa e trashëgimit tim dhe gota, në dorën
tënde është fati im! ______________
E bekoj Zotin që më dha kuptim, edhe
natën veshkat e mia më mësojnë. Zotin e kam gjithmonë para sysh, më rri në të
djathtë, nuk kam sesi të rrëzohem! Prandaj galdon zemra ime, gëzon shpirti im, mbarë
trupi im pushon në qetësi. ______________ Mbarë trupi im pushon në qetësi, sepse
s’do të ma lësh shpirtin në Nëntokë, as s’do të lejosh që Shenjti yt të kalbet
në dhe. ______________
Ti do të ma tregosh udhën e jetës, gëzimin e plotë
para fytyrës sate, kënaqjen e amshueshme në të djathtën tënde. ______________
Leximi
i dytë (1 Pjt 17-21)
Krishti duke vdekur ka paguar për lirinë tonë, duke
derdhur një çmim shumë më të madhe se ari e argjendi: ka paguar me gjakun e tij dhe
me vetë jetën e tij. Tani jeta e Krishtit është bërë e jona: megjithëse jeta e tij
është e paprishur dhe e pavdekshme, nuk trembet më nga e keqja dhe nga vdekja.
Lexim
prej Letrës së parë të shën Pjetrit apostull
Fort të dashur, në qoftë se
ju e quani atë Atë që pa krahambajtje gjykon gjithkënd sipas veprave të tija, kaloni
kohën e shtegtimit mbi tokë me frikën e Zotit! Dinie mirë: nuk keni qenë shpërblyer
nga mënyra e zbrazët e jetës suaj të trashëguar nga etërit me ndonjë send të shkatërrueshëm,
argjend apo ar, por me gjak të paçmueshëm të Krishtit, Qengjit të patëmetë e të panjollë.
Ai njëmend ishte i caktuar që para krijimit të rruzullit, por u dëftua në këto
kohët e fundit për arsye tuaj. Në saje të tij ju besoni në Hyjin që e ngjalli nga
të vdekurit dhe i dha lavdi, kështu që feja juaj dhe shpresa të jenë në Hyjin. Fjala
e Zotit!
ALELUJA, Aleluja. O Zot Jezus, na
e shtjello Shkrimin shenjt, dhe ndeze zemrën tonë derisa e dëgjojmë fjalën tënde. Aleluja.
Ungjilli (Lk 24, 13-35)
Ungjilltari Luka në të gjithë Ungjillin paraqet
jetën e Krishtit si një udhëtim të gjatë drejt Jeruzalemit, qyteti në të cilin vdesin
profetët. Pas vdekjes së tij dy dishepujt e Emausit kthehen në shtëpinë e tyre të
zhgënjyer, sepse kanë mbaruar ëndrrat e tyre të mëdha me Jezusin e Nazaretit. Jezusi
vetë u afrohet atyre dhe shpjegon që ringjallja e tij ishte shpallur në Shkrimet e
Shenjta dhe zbulohet në bekimin dhe thyerjen e bukës.
Leximi i Ungjillit
shenjt sipas Lukës
Ditën e Pashkëve dy prej nxënësve të Krishtit po shkonin
në një fshat që quhet Emaus, që është larg Jerusalemit gjashtëdhjetë stadje. Ata bisedonin
njëri me tjetrin për të gjitha këto ngjarje. Dhe ndodhi që, ndërsa ata po flisnin
e po bisedonin kështu, vetë Jezusi u afrua dhe po ecte me ta. Por sytë e tyre ishin
të penguar ta njihnin. Ai i pyeti: “Ç’janë këto fjalë që ju po i flisni ndër vete
udhës?” Ata u ndalën të trishtuar e njëri prej tyre, ai që quhet Kleofë, i përgjigji:
“A thua je ti i vetmi nga të huajt në Jerusalem që nuk di çka ndodhi në të po në këto
ditë?” Ai i pyeti: “Po çka?” Ata i përgjigjën: “Çka i ndodhi Jezusit prej Nazaretit,
që ishte profet i madh me vepra e me fjalë në sy të Hyjit e të mbarë popullit; si
krerët e priftërinjve dhe këshilltarët tanë e dorëzuan të dënohet me vdekje dhe e
kryqëzuan. Ne shpresonim se ai do ta çlironte Izraelin. E, përmbi të gjitha këto,
sot është e treta ditë me që ndodhën këto ngjarje. Madje edhe disa gra prej tanëve
na habitën: ato qenë në agim te varri e, pasi nuk e gjetën trupin e tij, erdhën e
na thanë se iu dukën engjëjt e u thanë se ai është gjallë. Po edhe disa prej tanëve
shkuan te varri dhe gjetën shi ashtu si thanë gratë, por atë nuk e panë.” Ai u
tha: “O të pamendë e të ngadalshëm që të besoni gjithçka paralajmëruan profetët! Po
a nuk u desh që Mesia t’i pësojë të gjitha e kështu të hyjë në lavdinë e vet?” E,
që nga Moisiu e të gjithë profetët, u shtjelloi krejt çka flitet në Shkrimin shenjt
për të. Kur iu afruan fshatit, ku ishin nisur, ai bëri kinse po vazhdonte udhën. Por
ata iu vunë: “Rri me ne se u bë natë e dita po shkon në të sosur!” Dhe hyri që të
rrijë me ta. Kur u ul me ta në tryezë, mori bukën, u falenderua, e theu dhe ua
dha. Atyre u hapën sytë dhe e njohën. Por ai u zhduk para syve të tyre. Atëherë i
thanë njëritjetrit: “Po a nuk na ndizej zemra neve ndërsa po bisedonte udhës me ne
dhe na shtjellonte Shkrimin shenjt?” U çuan menjëherë, u kthyen në Jerusalem, i gjetën
të mbledhur të njëmbëdhjetët dhe ata që ishin me ta. Të njëmbëdhjetët u thanë: “Me
të vërtetë u ngjall Zotëria dhe iu dëftua Simonit!” Atëherë edhe këta u treguan
çka u ngjau udhës dhe si e njohën kur e ndau bukën. Fjala e Zotit!
E
këtu mund të dëgjoni leximet biblike të liturgjisë së Fjalës së Zotit dhe komentin
apo homelinë, me pak fjalë programin tonë të së shtunës kushtuar Fjalës së Zotit
të së dielës…