Երանելի Յովհաննէս Պօղոս Բ. ի մարմինը , նման երանելի կամ սուրբ հռչակուած քահանայապետներու այլեւս կը հանգչի ս. Պետրոս տաճարին մէջ։

Հակիրճ արարողութենէ մը ետք, 2 մայիսին, Երանելի Յովհաննէս Պօղոս Բ-ի մարմինը զետեղուեցաւ սուրբ Սեփաստիանոսի խորանին տակ։ Խորանը կը գտնուի տաճարին աջ կողմը Միքէլ-Անճելոյի խորանէն անմիջապէս ետք։
Գերեզմանը ծածկուեցաւ պարզ սպիտակ մարմարով մը, որուն վրայ հետեւեալ արձանագրութիւնը կայ լատիներէն. ''Beatus Ioannes Paulus PP. Il'' այսինքն Երանելի Յովհաննէս Պօղոս Բ Քահանայապետ։ Անոր գերեզմանը շրջապատուած է պրոնզէ երկու հսկայ արձաններով` խորանին աջը Պիոս ԺԱ-ը (1922-1939), իսկ խորանին ձախը Պիոս ԺԲ-ը (1939-1958), որ դնել տուած էր երջանկայիշատակ կարտինալ Գրիգոր Պետրոս ԺԵ. Աղաճանեան երբեմնի կաթողիոս պատրիարք տանն Կիլիկիոյ կաթողիկէ հայոց , եւ Կառավարիչը ժողովուրդներու աւետարանութեան ժողովին։