Джым Кавізэл: на ўзбочыне кіно пасля “Пакутаў Хрыста”
“Роль Езуса ў фільме
Мэла Гібсана “Пакуты Хрыста” перашкодзіла маёй кар’еры як акцёра, але я ніколькі не
шкадую аб гэтым. Наадварот, яна стала вялікай магчымасцю ўмацаваць маю веру”, распавёў
амерыканскі акцёр Джым Кавізэл ў інтэрв’ю выданню Daily Mail. “Гібсан мяне папярэджваў,
што будзе цяжка. Ужо на здымках фільма ў мяне трапіла маланка і я пашкодзіў плячо
падчас працы над сцэнай укрыжавання. - сказаў Кавізэл - Пасля выхаду фільма на экраны
і ў выніку шматлікіх дыскусій аб ім, усё больш людзей у Галівудзе пачалі закрываць
перад мной дзверы. Так, паступова, я апынуўся на ўзбочыне кінематографа. Я разумеў,
што так магло адбыцца і гэта быў мой свядомы выбар. Як католіка і акцёра”.
Джым
Кавізэл, які перад “Пакутамі Хрыста” зняўся ў фільмах “Граф Монтэкрыста”, “Вочы Анёла”,
“Тонкая чырвоная лінія”, лічыўся новай зоркай амерыканскага кіно. Аднак з 2004 г.
ён стаў ахвярай нападак з боку шматлікіх СМІ за ўдзел у фільме на рэлігійную тэматыку.
У
сваім інтэрв’ю акцёр узгадвае, што ў сакавіку 2004 г., ён разам са сваёй сям’ёй быў
прыняты на аўдыенцы папам Янам Паўлам ІІ. “Я размаўляў з папам некалькі мінут і ў
гэты час я адчуваў сябе ў абдымках Бога. Гэта падзея вельмі ўмацавала маю веру”, успамінае
Джым Кавізэл.