Në Shqipëri përfundoi fushata për zgjedhjet administrative
(06.05.2011 RV)Përfundoi në Shqipëri fushata për zgjedhjet administrative,
që do të zhvillohen më 8 maj. Fushata u karakterizua nga incidente e polemika të shumta
në të gjithë vendin. Më pak se katër muaj pas ngjarjeve të dhimbshme të janarit, që
shkaktuan vdekjen e katër vetëve, së paku gjashtë kandidatë janë rrahur, ose kanë
qenë në shënjestër të bombave në banesë, apo në makinë. Një nga këto plagosi njërin
nga kandidatët e opozitës, jo më larg se dje. Zgjedhjet do të kontrollohen nga
mëse 400 vëzhgues. Natyrisht, gara më e fortë pritet në Tiranë, ku do të ndeshen ballë
për ballë kryetari aktual i bashkisë, lideri i socialistëve, Edi Rama dhe ish-ministri
i qeverisë së Berishës, Lulzim Basha, i cili ka kaluar nga Ministria e Punëve Publike
në atë të Jashtme e në atë të Brendshme, nga ku dha dorëheqjen për t’u kandiduar. Në
një mesazh për kombin, presidenti i Republikës, Bamir Topi i fton shqiptarët të marrin
pjesë masivisht në zgjedhje, duke nënvizuar se suksesi i tyre do ta ndihmojë vendin
në procesin e integrimit në Evropë.