Obama nuk lejon publikimin e fotografive të trupit të Bin Ladenit
Presidenti amerikan Barak Obama shkoi sot pasdite në Ground Zero të Nju Jorkut, ku
u takua me një grup viktimash të atentateve të 11 shtatorit 2001. Vizita e tij, gjatë
së cilës Obama vendosi edhe një kurorë lulesh në kujtim të të vrarëve, u bë menjëherë
pas vendimit të Shtëpisë së Bardhë për të mos i bërë publike fotografitë e trupit
të Osama Bin Ladenit, vrarë në Pakistan nga forcat speciale amerikane. Lajmi nuk i
pëlqeu aspak Komisariatit të Lartë të OKB-së për të drejtat e njeriut, që kërkoi botimin
e tyre dhe të të gjitha lajmeve mbi vrasjen e liderit të Al Kaedës: “There’s
no doubt that we killed Osama Bin Laden…” “Nuk ka asnjë dyshim se ne e
kemi vrarë Osama Bin Ladenin”, tha presidenti amerikan në një intervistë për CBS(SiBiEs).
Por, Obama sqaroi se nuk ka asnjë dëshirë t’i tregojë fotografitë e kësaj vrasjeje
sikur të ishin “trofe”. Kështu pra, Shtëpia e Bardhë vendosi sipas direktivave të
kujdesshme të sekretares së shtetit, Hilari Klinton dhe të sekretarit për Mbrojtjen,
Robert Gejts, të shqetësuar për reagimin e botës arabe. Ndërkaq, sulmi që çoi në
vrasjen e liderit të Al Kaedës vazhdon të krijojë probleme në marrëdhëniet ndërmjet
Uashingtonit e Islamabadit. Pakistanezët akuzohen se nuk bashkëpunojnë si duhet në
luftën kundër Al Kaedës, ndërsa amerikanët se më parë e kanë kapur e pastaj e kanë
vrarë me gjakftohtësi Bin Ladenin, siç dëshmoi vajza e tij 12-vjeçare, e përgënjeshtruar
nga CIA.