ֆրանսայի Ռէնս Քաղաքի Աթոռանիստ Եկեղեցւոյ Շինարարութեան 8-րդ Դարադարձը

Յառաջիկայ 6 մայիսին՝ սկիզբ կ'առնեն ֆրանսայի Ռէնս քաղաքի աթոռանիստ եկեղեցւոյ շինարարութեան 8րդ դարադարձի բազմազան, մշակութային թէ գեղարուեստական հանդիսութիւնները, որոնք պիտի տեւեն եօթը ամիս։ Ռէնսի աթոռանիստ եկեղեցին ֆրանսական ՜՜կոթիկ՝՝ ոճին մեծագոյն իրագործումն է, յատկանշուած՝ իր իւրայատուկ ճարտարապետութեամբ ու 2303 արձաններով։ Եկեղեցին 1991էն ի վեր մաս կը կազմէ Ունեսքոյի համաշխարհային ժառանգութեան եւ ամէն տարի աւելի քան 1,5 միլիոն այցելուներ կ'ընդունի։
Տօնակատարութիւնները սկիզբ պիտի առնեն գոհաբանական պատարագով յառաջիկայ 15 մայիսին, որուն պիտի մասնակցի ֆրանսայի մօտ առաքելական դեսպանը ու շրջանի բոլոր եպիսկոպոսները։ Իսկ փակման հանդիսութիւնը նախատեսուած է 23 հոկտեմբերին՝ աթոռանիստ եկեղեցւոյ տարեդարձի օրը։
Նշենք թէ Ռէնսի աթոռանիստ եկեղեցին եղած է ֆրանսայի թագաւորներու օծումի վայրը։ Եկեղեցւոյ ճակատին մէջտեղը կը բարձրանայ արձանը Գլովիս արքային շրջապատուած իր կողակիցով, սրբուհի Գլոդիտով եւ սուրբ Ռեմիով։