Рым: Мітрапаліт Філарэт прымае ўдзел у экуменічным форуме

4 мая ў Рыме праходзіць экуменічны форум пад назвай “Дар старасці. Праваслаўныя і католікі на шляху міласэрнасці”, у якім прымае ўдзел Мітрапаліт Мінскі і Слуцкі Філарэт. Арганізатарам гэтага мерапрыемства з’яўляецца дабрачынная каталіцкая арганізацыя “Супольнасць св. Ігідзія”. У форуме удзельнічаюць таксама кардынал Курт Кох, кіраўнік Папскай рады спрыяння хрысціянскаму адзінству.

У ранішнім пасяджэнні з дакладамі аб ролі старых людзей у гісторыі, у навучанні Айцоў Касцёла, аб іх месцы ў Бібліі і тэалогіі малітвы, выступілі прадстаўнікі Праваслаўнай Царквы і Каталіцкага Касцёла: іерархі з Італіі, Румыніі і Украіны.

Падчас сённяшняй працы форума, удзельнікамі будзе абмяркоўвацца тэма, натхнёная радком з Кнігі Мудрасці: “Не пагарджайце чалавекам, калі ён састарыцца”. Заключная частка сённяшняга экуменічнага спаткання ў Рыме будзе называцца “Вялікія старыя асвячоныя Духам”. Яна будзе прысвечана такім людзям, як Патрыярх Канстанцінопальскі Афінагор, благаслаўлёны папа Ян Павел ІІ, Патрыярх Маскоўскі Ціхан.