Ambasadori OSBE Wollfarth: Në Shqipëri 8 maji duhet të jetë ditë e qetë
Në kuadër të përgatitjeve të fundit për zgjedhjet e 8 majit në Shqipëri, ambasadori
i OSBE në Tiranë, Eugen Wollfarth, zhvilloi sot një takim me ministrin e Brendshëm
të Shqipërisë, Bujar Nishani. Duke theksuar se forcat e policisë janë trajnuar për
zgjedhjet dhe duhet të jenë në shërbim të qytetarëve në 8 maj, Wollfarth u bëri thirrje
edhe votuesve që në këtë ditë të kontribuojnë në mënyrë paqësore, duke e parë atë
si një ditë festive dhe të qetë. Të dielën e ardhshme më 8 maj në votimet lokale
do të jenë në gatishmëri rreth 6500 forca policore në të gjithë territorin e Shqipërisë.
Incidentet e deritanishme në fushatën elektorale, aktet e dhunës, shpërthimet me lëndë
eksplozive, dëmtimet e zyrave elektorale të kandidatëve, deklaratat e nxehta mes subjekteve
politike etj, kanë krijuar një lloj klime tensioni, kur duhen dhe pak ditë nga votimet.
Për ministrin e Brendshëm të Shqipërisë, Bujar Nishani, detyra e policisë së shtetit
është që të parandalohet, ose të trajtohet në përkim me ligj çdo akt, që do të cenojë
normalitetin e procesit zgjedhor. Misioni kryesor i policisë së shtetit është "krijimi
i një klime sa më të qetë dhe të sigurt për qytetarët, që ata të shprehin lirshëm
të drejtën e votës më 8 maj". Sipas tij dy dokumentet e rëndësishme, që orientojnë
dhe garantojnë standardet, si ato të vendeve të BE së, janë ligji për funksionet e
policisë së shtetit dhe kodit elektoral në pjesët, që përcakton të drejtat dhe detyrat
e saj në të gjithë procesin. Aktive në mbështetjen e policisë së shtetit është zyra
e OSBE në Shqipëri, që mori pjesë në fushatën e trajnimit me punonjësit e policisë.
Në fillim të javës shefi i zyrës, ambasadori Eugen Wolfrath, i ka vlerësuar maksimalisht
përgatitjet, që ka bërë policia shqiptare për zgjedhjet, siç ka deklaruar ai "e përgatitur
siç duhet dhe plotësisht e ndërgjegjshme për nevojën e mbajtjes së zgjedhjeve të lira
dhe akçes të lirë në mbështetje të qytetarëve". Ambasadori Wolfarth konfirmoi projektin
mbështetës të policisë në ditën e zgjedhjeve, ku OSBE ja do t'i akordojë një sasi
telefonash satelitorë për të mbuluar komunikimin mes njësive policore në zonat më
të thella rurale të vendit.