Vritet Bin Ladeni. Bota gëzon, Kisha Katolike kujton përgjegjësitë
Osama Bin Laden, kreu i terrorizmit botëror nuk jeton më. Lajmin e dha Presidenti
i SHBA-se Obama. Gjatë natës së djeshme, me orën evropiane, trupat amerikane e vranë
me një plumb në kokë në periferinë e Islamabadit. Bashkë me të është vrarë edhe njëri
nga bijtë. Talebanët pakistanezë paralajmëruan se do të hakmerren me sulme kundër
Pakistanit dhe SHBA-ve. E sot, një atentat ka shkaktuar katër të vdekur e dhjetë të
plagosur në një xhami të Çarsadës, në Peshauar. Ndërsa kancelaritë botërore përgëzojnë
presidentin Barak Obama për këtë fitore e amerikanët shprehin gëzimin e tyre nëpër
sheshe, Kisha Katolike, sidomos ajo vendore, tërheq vëmendjen mbi pasojat, që mund
të ketë një akt i tillë kundër të krishterëve e kujton përgjegjësitë e të gjithëve
në vendosjen e paqes. Duke iu përgjigjur pyetjeve të gazetarëve, zëdhënësi i Selisë
së Shenjtë, atë Federiko Lombardi komentoi: “Osama Bin Laden – siç
e dimë të gjithë – pati përgjegjësi të rëndë në përhapjen e përçarjes e të urrejtjes
ndërmjet popujve, duke shkaktuar vdekjen e shumë të pafajshmëve e duke përdorur edhe
fetë për këtë qëllim. Para vdekjes së një njeriu, i krishteri nuk gëzohet
kurrë, por reflekton mbi përgjegjësitë e rënda të secilit para Zotit e para njerëzve
dhe, shpreson e impenjohet që kjo ngjarje të mos i shërbejë thellimit të mëtejshëm
të urrejtjes, por arritjes së paqes”. Kryeipeshkvi i Islamabadit, imzot
Entoni Rafin (Anthony Rufin) u kujton të krishterëve “dashurinë për armiqtë”, që predikon
Ungjilli dhe u jep shembullin e Papës së lum Gjon Pali II. Ndërkaq, ish-kryeipeshkvi
i Lahores në Pakistan dhe ipeshkvijtë indianë paralajmërojnë se vdekja e Osama Bin
Ladenit mund të ketë pasoja për të krishterët e zonës e mund të rrisë sulmet e talebanëve
kundër tyre, pavarësisht se pas një kohe relativisht të gjatë, mund të shërbejë për
ta dobësuar radikalizmin islamik. Atë që nuk arriti ta bënte presidenti amerikan
Bush gjatë viteve të luftës kundër terrorizmit, e realizoi Barak Obama, pikërisht
në prag të një fushate zgjedhore të rëndësishme, të cilën do ta përballojë me një
armë më shumë. Kapja dhe vdekja e Osama Bin Ladenit, i shpallur si rreziku numër një
për të gjithë botën, është sigurisht një ngjarje mediatike me përmasa të jashtëzakonshme,
por shpejtësia me të cilën trupi pa jetë u hodh në det, për të mos u dhënë ndjekësve
të tij një varr për ta nderuar, fakti i kapjes së liderit të terrorit në Pakistan,
aty ku gjithnjë është menduar se ndodhej, ngrenë shumë pikëpyetje. Al-Kaeda nuk
ka qenë asnjëherë organizatë hierarkike, pasi ka shumë komandantë, prandaj Bin Ladeni
ishte më tepër një simbol, se sa një kryetar i vërtetë. Eliminimi i tij fizik mund
të mos jetë goditja përfundimtare kundër terrorizmit, siç shpresojnë amerikanët, të
cilët po festojnë që nga nata e djeshme. Pas sulmit në Nju Jork dhe në Uashington,
më 11 shtatorin e vitit 2001, Al-Kaeda u zhvillua në mijëra degë të ndryshme, duke
u aktivizuar sidomos në Afrikën e Veriut e në Lindjen e Mesme e duke ua besuar atentatet
vetëvrasëse, si ato të Madridit e të Londrës, grupeve të vogla me njerëz të ekzaltuar. Edhe
vetë presidenti i SHBA-ve, duke thënë se “drejtësia u vendos”, nuk harroi të theksonte
se lufta kundër terrorizmit islamik mund të jetë e gjatë. Por ta dëgjojmë: “Sonte
mund ta njoftoj popullin amerikan dhe botën, se SHBA-të udhëhoqën një operacion me
të cilin vranë Osama Bin Ladenin, kreun e Al Kaedës e terroristin përgjegjës për vrasjen
e mijëra vetëve: burra, gra e fëmijë të pafajshëm… Unë e kam bërë të qartë,
ashtu si presidenti Bush pas 11 shtatorit, se lufta jonë nuk është kundër islamizmit,
sepse bin-Ladeni nuk ishte udhëheqës mysliman. Ai ishte vrasës i myslimanëve. Al-Kaida
ka vrarë qindra myslimanë në shumë vende, përfshirë Shtetet e Bashkuara”. Obama
i paralajmëroi amerikanët se lufta kundër terrorizmit nuk ka përfunduar. Më optimist
Piter Bergen, gazetari që intervistoi Osama Bin Ladenin për rrjetin televiziv CNN
në vitin 1997 e që ka shkruar një sërë librash mbi rrjetin e terrorit. Ai pyet: “A
do të arrijë vërtet Bin Ladeni të bëhet martiri, që dëshironte të ishte? Vrasja e
tij është fundi i luftës kundër terrorit. Askush s’mund ta zëvendësojë brenda Al-Kaedës”. Vrasja
e Osama Bin Ladenit u arrit 3.519 ditë pas atentateve të 11 shtatorit 2001. Interpoli
paralajmëroi menjëherë për rritjen e rrezikut terrorist pas kësaj vrasjeje. Cili mund
të jetë skenari i ardhshëm botëror? Pyetëm eksperten italiane të terrorizmit ndërkombëtar,
Loreta Napoleoni: Mendoj se është shumë e vështirë të parashikohet me saktësi
reagimi i ndjekësve të Bin Ladenit. Unë nuk do të flisja për botë islamike e aq më
pak myslimane, sepse përkatësia fetare nuk ka të bëjë aspak me terrorizmin. Sigurisht,
Bin Ladeni ishte një lloj ikone për një grup njerëzish në botë, shumë radikalë, që
shihnin në të simbolin e asaj lufte kundër imperializmit amerikan, që quhet “fondamentalizëm
islamik”. Është e vështirë të parashikohet reagimi. Natyrisht, të gjitha shërbimet
sekrete janë në alarm: ekziston frika që ndokush të organizojë ndonjë sulm për t’u
hakmarrë. Gjithsesi, është shumë e vështirë të organizohet një atentat me përmasat
e 11 shtatorit, ose si ai i stacionit të Atoçës në Madrid, apo si ai në Angli. Edhe
antiterrorizmi ka bërë shumë hapa përpara e rrjeti me në qendër Osama Bin Ladenin
është dobësuar gjithnjë e më tepër pas 11 shtatorit. Nga ana tjetër, kemi edhe një
element shumë të rëndësishëm. Të rinjtë e botës myslimane, sot për sot, janë përqendruar
mbi ç’po ndodh në Afrikën e Veriut e në Lindjen e Mesme, mbi atë, që shumë gazetarë
e kanë quajtur “pranvera arabe”. Pra, ekziston një alternativë demokratike në vend
të veprimtarisë terroriste të tipit të Al Kaedës.