Вігілія беатыфікацыі: святымі становяцца або пры жыцці, або ніколі
Каля 200 тыс. чалавек
прынялі ўдзел у вігіліі беатыфікацыі Яна Паўла ІІ, якая адбылася ў Рыме вечарам 30
красавіка. Падчас гэтага набажэнства, на тэрыторыі былога Вялікага Цырка, тысячы гарачых
сэрцаў вернікаў злучыліся ў малітве і разважаннях над постаццю новага благаслаўлёнага.
Першым, сваімі ўспамінамі аб Яне Паўле ІІ падзяліўся доктар Хаакін Наварра-Вальс,
былы кіраўнік Залі Друку Апостальскай Сталіцы. “Той хто кажа “Святы зараз” трохі спазняецца,
бо святымі становяцца або пры жыцці або ніколі”, - сказаў ён.
Сястра Марыя
Сімон-Пьер расказала аб сваім аздараўленні ад хваробы Паркінсана дзякуючы малітве
праз заступніцтва Яна Паўла ІІ. “Папа быў Пастырам дарагім Божаму сэрцу, блізкім да
ўсіх – бедных, малых, хворых, абаронцаў жыцця, сем’яў”, - сказала сястра.
Сваімі
ўспамінамі падзяліўся таксама кардынал Станіслаў Дзівіш, асабісты сакратар новага
благаслаўлёнага. Іерарх прыгадаў заклікі Папы супраць мафіі, супраць вайны ў Іраку,
ён распавёў аб сяброўстве Пантыфіка з італьянскім прэзідэнтам сацыялістам Перціні,
а таксама аб апошніх момантах жыцця Яна Паўла ІІ. “Папа паказаў нам, як памірае сапраўдны
хрысціянін”, - сказаў кардынал Дзівіш.
На заканчэнне ружанца, адбылося прамое
ўключэнне з Апостальскага Палацу ў Ватыкане, адкуль папа Бэнэдыкт XVI удзяліў сабраным
у Вялікім Цырку сваё благаслаўленне. Пасля вігіліі шматлікія вернікі працягнулі чуванне
ў касцёлах, якія былі адчынены на працягу ўсёй ночы ў гістарычным цэнтры Рыма.