Pranë Radio Vatikanit, fillojnë punimet e Asamblesë së Bashkimit Evropian të Radio-Televizionit
(27.04.2011 RV)Me ftesën e Radio Vatikanit, që sivjet kremton 80-vjetorin e
themelimit, Bashkimi Evropian i Radio-Televizionit (Uer-Ebu), shoqatë që grupon emitentet
radiotelevizive të shërbimit publik, të cilat veprojnë në Evropë e në pellgun Mesdhetar,
do të mbajë pranë Radio Vatikanit, nesër e pasnesër, Asamblenë e vet të 17-të. Punimet
do t’i hapë kryeipeshkvi Klaudio Maria Çeli, kryetar i Këshillit Papnor të Komunikimeve
Shoqërore. Për këtë takim, kaq të rëndësishëm, në prag të Lumnimit të Gjon Palit II,
intervistuam drejtorin e zyrës për marrëdhëniet ndërkombëtare të Radio Vatikanit,
Xhakomo Gizani:
Përgjigje: - Radio Vatikani shpreh
kënaqësinë për këtë takim, në të cilin do të marrin pjesë radiot, që punojnë në Evropë
e në Afrikën e Veriut e që i përkasin kësaj shoqate profesionale, sektori më i vlerësuar,
që ushtron ndikimin më të madh në nivel botëror.
Pyetje: - Cilat
janë temat, në qendër të vëmendjes së takimit?
Përgjigje: -
Asambleja e Radiove do të prekë temat më të rëndësishme, që kanë të bëjnë me punën
e emitenteve, posaçërisht temat e shërbimit publik, në një kohë kur vetë shërbimi
publik duhet t’i bëjë mirë llogaritë me disa problematika të vështira, siç janë,
për shembull, pakësimi i burimeve materiale, që vihen në dispozicion nga qeveritë
e nga shtetet; konkurrenca me radiot e me shërbimet tregtare, me një optikë të ndryshme,
nga ai i shërbimit publik, e edhe shërbimi, që këto emitente duhet t’i bëjnë shoqërive
përkatëse, për t’iu përgjigjur realisht misionit të tyre. E misioni është të zhvillojnë
modele dialogu, ballafaqimi të hapur, pluralistik, në atmosferën e lirisë së informacionit.
Pyetje: - Lidhur me misionin, cili është kontributi i veçantë,
që mund të japë Radio Vatikani?
Përgjigje: - Kontributi i
parë, natyrisht, është ai i një emitenteje, që bën dialog e ballafaqim të veçantë.
Ky dialog e ky ballafaqim, në rastin tonë, është në shërbim të fesë së krishterë.
Qëllimi kryesor është edukimi i njerëzve me vlerat e idealet, që duhet të frymëzojnë
çdo bashkësi. E ky kontribut vlerësohet. Për këto probleme do të flasë përfaqësuesi
i Radio Vatikanit, duke theksuar se radioja ndiqet me interes të sinqertë, për origjinalitetin
e kontributeve që jep ditë për ditë. E nuk duhet harruar se Radio Vatikani është ndërmjet
themeluesve të Ebu (European Broadcasting Union).