Pashkë në Jeruzalem: në Bazilikën e Ngjalljes kremtohet Nëna e të gjitha netëve të
lutjes.
Më se njëqind meshtarë bashkëkremtuan sot paradite, Ritet e Natës së Pashkëve, kryesuar
nga patriku latin i Jeruzalemit, imzot Fuad Tual. Kremtim i jashtëzakonshëm, i
ngarkuar me emocione e thella, në vendin ku ndodhi ngjarja më e dëshëruar, më e jashtëzakonshme,
më e lumtur për njeriun, i cili ëndërroi që në zanafillë, të rikthehej në çastin e
pafaj të krijimit, kur nuk kishte mëkatuar ende! Kur ishte i pavdekshëm. Kujtojmë
se Nata e Pashkëve në Jeruzalem kremtohet paradite, në përkim me rregulloren, që përcakton
normat për praninë e bashkësisë së krishterë në këtë Bazilikë, zemër e krishtërimit.
Koha e rregullores nuk përkon me kohën e Kishës, e megjithatë ky kremtim duhet parë
si parí e lume, sepse në këtë rast Kisha e Jeruzalemit u priu të gjitha kremtimeve
në mbarë botën. Prej saj kumboi së pari himni i lashtë, që i këndon fitores së Zotit
mbi vdekjen e mbi mëkatin. Përkrah patrikut latin, që kryesoi Meshën, ishin kryeipeshkvi
i nderit i Pragës, kardinali Miroslav Vlk; ipeshkvi-ndihmës i Jeruzalemit, Kamal Batish,
ipeshkvi ndihmës i Veronës, kapuçini Flavio Roberto Karraro dhe 120 meshtarë. Kremtimi,
që ndjek liturgjinë latine, duke e pasuruar edhe me liturgjinë e lashtë, tejet të
pasur, të Jeruzalemit, nisi te portat e Bazilikës, para Gurit të vajtimit. Këtu u
kremtua liturgjia e zjarrit. Pastaj i erdhi radha Qiriut të Pashkëve, që merr dritën
nga flaka e llambës, ndezur ditë-natë, pa u shuar kurrë, duke ndriçuar çdo njeri me
dritën e vërtetë, dritën e Varrit të zbrazur të Zotit. Sipas ritit romak kremtimi
vijoi me shpalljen në gjuhën latine të 7 leximeve nga Besëlidhja e Vjetër, duke përshkuar,
kështu, të gjithë historinë e Shëlbimit. Të shumëdashur vëllezër e motra, tha patriku
Tual në fillim të Meshës, jemi mbledhur në këtë vend, ku Zoti ynë Jezu Krishti kaloi
nga vdekja në jetë. Këtu po i rijetojmë sot Pashkët e Zotit. Riti vijoi me këngën
e Lavdisë dhe me leximin e Letrës së Shën Palit, që flet për Besëlidhjen e re, përmbushjen
e premtimeve. Ungjilli, pastaj. Rikujtoi ngjarjen e ndodhur pikërisht këtu, i çoi
besimtarët dymijë vjet pas, e njëkohësisht u foli për e në të sotmen. Ungjilli i Ringjalljes
lexohej pikërisht në vendin e Ringjalljes! Një rrënqethje misterioze i pushton
gjithnjë besimtarët, kur meshtari thyen heshtjen e thellë dhe shqipton fjalët e lashta
e të reja, regjistuar në gurët e këtij vendi të shenjtë: “Nuk është këtu! U ngjall!”. Shtegtarë
e besimtarë të të gjitha gjuhëve, në këtë paradite të jashtëzakonshme, rijetuan kumtin
madhështor të Pashkëve, që u dëgjua për herë të parë pikërisht këtu. Këtu, ku sot
u lartua drej qiellit Anastasis, ishte kopshti i ullinjve, kopshti i varreve, i varrit
më të adhuruar nga mbarë krishterimi, prej nga për herë të parë në historinë e Krijimit,
vibroi drita e Ringjalljes! Përfundimi i kremtimit të Natës së Pashkëve, ndonëse
nën dritën e diellit, pati një frymëmarrje të ndjeshme ekumenike. Dalëngadalë Bazilika
u mbush plot me besimtarë ortodoksë, të cilët në orën 12.00 nisën kremtimin e liturgjisë
së zjarrit të shenjtë, duke lënë pas shpatullave Qytetin e Jeruzalemit, përplot me
shtegtarë të krishterë e me hebrenj (Pashkët e të cilëve sivjet kremtohen në të njëjtën
ditë), e të blinduar, për të ruajtur qetësinë gjatë kremtimeve. Sonte Bazilika e
Ringjalljes do të jehojë përsëri nga himnet e liturgjisë së latinëve. Në orën 23.
30 do të fillojë liturgjia e orëve, kryesuar nga Rojtari i Tokës së Shenjtë. Të krishterët
mund të bashkohen, kështu, me të gjithë Kishën, që kremton e lutet edhe këtu, në më
të shenjten nga të gjitha bazilikat e botës. E ndërkaq, në Bazilikën e Ringjalljes
ka aguar tashmë Dita e Pashkëve!