Benedikti XVI: Bariu i mirë e frika përballë ujqërve.
Në të gjithë veprimtarinë e tij, ashtu si në homelinë e parë, Benedikti XVI vë theksin
mbi misionin e bariut në botën e sotme, ku ka një mori formash të shkretëtirës: "Shqetësimi
i shenjtë i Krishtit duhet ta gjallërojë bariun: ai nuk mund të qëndrojë indiferent
përballë njerëzve që jetojnë në shkretëtirë. E ka lloj-lloj formash të shkretëtirës:
shkretëtira e mjerimit, e urisë dhe e etjes, e braktisjes, e vetmisë, e dashurisë
së shprishur. Eshtë edhe shkretëtira e mosnjohjes së Zotit, e zbrazjes së shpirtrave
që humbasin vetëdijën e dinjitetit e të rrugës së njeriut. Shkretëtirat e jashtme
shtohen në botë, sepse bëhen gjithnjë më të hapta shkretëtirat e brëndshme, ato shpirtërore.
E detyra e barinjve të Krishtit është pikërisht t’u prijnë njerëzve, për t’i nxjerrë
nga shkretëtira. Në Lindjen e lashtë ishte zakon që mbretërit ta quanin veten barinj
të popullit. Ishte simbol i pushtetit të tyre, figurë cinike: për ta popujt ishin
si bagëtitë, me të cilat mund të bënin sipas qejfit". Ndërsa bariu i
të gjithë njerëzve, Zoti i gjallë, u bë vetë qengj, mori anën e qengjave, të atyre
që shtypen e që mbyten. Unë jap jetën time për delet e mia – thotë Krishti për vetveten.
Ajo që të çliron nuk është forca, por dashuria. Kjo është shenja e Zotit: ai vetë
është dashuri. Sa herë dëshirojmë që Zoti të tregohej më i fortë, të dënonte ashpërsisht,
ta mundte të keqen e të ndërtonte një botë më të mirë. Të gjitha ideologjitë e forcës
përligjen kështu, përligjin shkatërrimin me atë që i kundërvihet progresit dhe çlirimit
të njerëzimit. Ne vuajmë për shkak të durimit të Zotit. "Botën mund ta shpëtojë
i Kryqëzuari e jo kryqëzuesit! Bota shpëtohet nga durimi i Zotit e shkatërrohet nga
padurimi i njerëzve". Benedikti XVI vuri theksin edhe mbi cilësitë themelore
të bariut, i cili duhet t’i dojë njerëzit që i janë besuar, sepse të kullosësh do
të thotë të duash e të jesh gati për të vuajtur. E Papa u kërkoi besimtarëve: “Lutnju
për mua, që të mësoj për ta dashur gjithnjë më shumë grigjën time - ju vetë, Kishën
Shenjte, secilin veç e veç e të gjithë së bashku e, sidomos, të mos iki, nga frika,
përballë ujqërve".