19 красавіка будзе
адзначацца 6 год з дня абрання на Пасад св. Пятра кардынала Ёзэфа Ратцынгера, які
прыняў імя Бэнэдыкт XVI. Ужо на пачатку свайго пантыфіката Святы Айцец акрэсліў сваю
місію як “умацаванне хрысціян у веры”. Сведчаннем гэтага сталі тры энцыклікі і две
апостальскія адгартацыі, якія напісаў Бэнэдыкт XVI. Не так даўно была апублікавана
кніга-інтэрв’ю са Святым Айцом “Святло свету” і другі том яго кнігі пад назвай “Езус
з Назарэта”.
Акрамя таго Папа здзейсніў шматлікія пастырскія падарожжы на
розныя кантыненты. За 6 год свайго пантыфіката Святы Айцец наведаў 19 краін (у тым
ліку Бразілію, ЗША, Аўстралію, Камерун і Анголу). Клопат аб хрысціянах і ўсталяванне
добрых адносін з Кітаем, краінамі Блізакага Усхода, Афрыкі і Еўропы застаюцца прыярытэтнымі
ў знешнепалітычнай дзейнасці Апостальскай Сталіцы. За пошнія 6 год былі ўсталяваны
дыпламатычныя адносіны паміж Святым Пасадам і Чарнагорыяй, Аб’яднанымі Арабскімі
Эміратамі, Батсванай і Расіяй.
Ужо ў адной са сваіх першых прамоваў пасля
канклава ў 2005 г. Бэнэдыкт XVI абвясціў, што адным з самых актуальных заданняў на
сённяшні дзень ён бачыць “няспынную працу, без шкадавання сіл для аднаўлення поўнага
і бачнага адзінства ўсіх вучняў Хрыста”. Дзеля гэтага задання Пантыфік аднавіў дыялог
з экскамунікаванымі ў 1988 г. біскупамі Брацтва св. Пія X. Таксама былі ўсталяваны
ардынарыяты для былых англіканаў, стала паглыбляюцца кантакты з прадстаўнікамі пратэстансіх
і Усходніх Цэркваў, юдэямі і мусульманамі.
Бэнэдыкт XVI шмат увагі надае будучыні
еўрапейскага кантынента. Ён часта нагадвае аб вялікай хрысціянскай спадчыне Еўропы,
якая з’яўляецца фундаментам яе духоўнага адзінства. Ён заклікае да абароны ад спробаў
маргіналізацыі хрысціянства ў грамадскім жыцці еўрапейскіх краін. Бэнэдыкт XVI добра
ведае, што Евангелле сёння патрэбнае нават тым, хто аддаліўся ад Касцёла – перш за
ўсё людзям з секулярызаваных краін. Таму 12 кастрычніка 2010 г. была створана спецыяльная
дэкастэрыя – Папская рада па новай евангелізацыі, а таксама пачала працу ініцыятыва
“Падворак язычнікаў”, якая мае за мэту ўсталяванне адносінаў і дыялога з няверуючымі.