Thirrje e Konferencës Ipeshkvnore të Shqipërisë për zgjedhjet vendore të 8 majit.
Qarkore e Konferencës Ipeshkvore te Shqipërisë me rastin e zgjedhjeve vendore 2011
Të dashur besimtarë, të nderuar qytetarë, Më 8 maj qytetarët e Republikës
së Shqipërisë janë të thirrur për të votuar në zgjedhjet vendore. Avantazhi më i madh
i një shoqërie demokratike është fakti se zërat dhe dëshirat e qytetarëve mund të
shprehen, veçanërisht në votime. Atëherë demokracia u garanton qytetarëve mundësinë
jo vetëm për të zgjedhur ata që do të qeverisin, por edhe, sikurse ka thënë Papa Gjon
Pali II, “...për të kontrolluar qeveritarët e vet, ashtu edhe për t’i zëvendësuar
ata në mënyrë paqësore, ku kjo rezulton e arsyeshme”. Gjithashtu në doktrinën e saj
shoqërore, Kisha Katolike shpeshherë u ka kujtuar qytetarëve se votimi nuk është vetëm
një e drejtë, por edhe një detyrë, në dobi të së mirës së përbashkët. Në një nga
dokumentet më të rendësishme të Konçilit II të Vatikanit lexojmë: “Kisha mendon se
është vepër e lavdishme dhe e nderueshme kur njerëzit kushtohen për të mirën e shtetit
dhe marrin mbi veti barrën e përgjegjësisë duke u shërbyer njerëzve” (GS 57). Prandaj
na duhet të shprehim vlerësimin dhe mirënjohjen tonë ndaj atyre që, me drejtësi dhe
pastërti, angazhohen në politikë duke pasur parasysh të mirën e popullit që i ka zgjedhur
për t’i udhëhequr. Duke ju kujtuar detyrën tuaj, si qytetarë, ju ftojmë të tregoheni
të matur gjatë fushatës duke shmangur çdo akt dhune dhe të përdorni mirë votën tuaj
për të mirën e përbashkët. Gjithashtu qysh tani u drejtohemi atyre që do të zgjidhen
si kryetarë bashkishë apo komunash dhe u bëjmë thirrje që: - të luftojnë çdo lloj
korrupsioni. Mos të harrojnë kurrë se pozita e tyre i ka vendosur si model drejtësie
dhe transparence. Viktimat e parë të një sistemi të korruptuar janë personat më të
brishtë dhe të pambrojtur; - të afrojnë dhe të ndihmojnë më shumë të varfërit,
të menjanuarit, të lënët pas dore, të papunët, duke i promovuar drejt një jete më
të denjë. Mos të harrojnë se çdo njeri, i krijuar në përngjasimin e Hyjit, ka një
dinjitet të pazëvendësueshëm. Ju urojmë përzemërsisht Pashkët: kjo festë na sjelltë
sivjet nje shpresë të re që, të ndriçuar nga drita e Krishtit fitimtar mbi vdekjen,
të mund të ndërtojmë së bashku qyteterimin e paqes dhe të vëllazërisë. Ipeshkëvinjtë
e Kishës Katolike të Shqipërisë Tiranë 15.04.2011 _______________________________________________________________________________________________
Rr.Don Bosko, nr. 4, K.P. 2950, Tiranë, Albania tel/fax +355 4 22 47 159 cealbania_al@yahoo.com