Pakistan: gratë e krishtera detyrohen me forcë të ndërrojnë fenë
(15.04.2011 RV)Shtohet, në Pakistan, numri i grave që kthehen me detyrim në
fenë islame. E njëkohësisht, edhe numri i martesave me dhunë ndërmjet tyre e burrave
me fe myslimane. Viktimat janë kryesisht vajzat e krishtera e hinduiste, që u përkasin
pakicave fetare në vend. Sipas njoftimit të agjensisë Fides, fenomeni po bëhet gjithnjë
më shqetësues. Prandaj Kisha në Pakistan vijon ta denoncojë me forcë, duke kërkuar
edhe bashkëpunimin e institucioneve, për t’i dhënë fund një dhune të tillë. Vajzat
e krishtera janë më të ligështa e më të pambrojtura, sepse bashkësitë prej nga vijnë
vijojnë t’u nënshtrohen prej kohe kërcënimeve, pa mundur të kundërshtojnë. Shpesh
nuk e marrin fare guximin t’i denoncojnë aktet e dhunës, shpjegon një rregulltare,
që punon për t’i ndihmuar gratë në situata të vështira. Në një shoqëri, që lejon
diskriminimin e pakicave fetare, në mënyrë të posaçme, të grave, feja e shumicës dhe
pozita shoqërore shërbejnë vetëm për të kryer akte dhune. Në një raport të Centre
for Legal Assistence and Settlement (CLAAS), që merret me asistencën ligjore të të
krishterëve të diskriminuar e të persekutuar në Pakistan, konfirmohet se situata
është shumë kritike.