(15.04.2011 RV)Gjykata Ndërkombëtare e Hagës dënoi sot me 24 vjet burg Ante
Gotovinën, gjeneralin kroat të akuzuar për krime lufte gjatë konfliktit me Serbinë.
18 vjet për një gjeneral tjetër kroat, Mladen Markaç. Pavarësisht se konsiderohet
hero në atdhe, gjenerali Gotovina u hodh në gjyq për krime lufte gjatë Operacionit
të famshëm “Oluja” (Stuhia) në gusht 1995. Nga Kroacia u përzunë mijëra qytetarë me
kombësi serbe, qindra prej të cilëve u vranë. Gjenerali u arrestua më 7 dhjetor 2005
në ishullin e Tenerifes në Kanarie, pasi qe fshehur për katër vjet me radhë. Procesi
kundër tij filloi më 11 mars 2008 e përfundoi në shtator 2010. U konsiderua fajtor
për 8 akuza, ndër të cilat vrasje, persekutim e përzënje me dhunë. Prokurori pati
kërkuar dënim me 27 vjet burgim. Së bashku me Ante Gotovinën, në bankën e të akuzuarve
u ulën edhe dy ish-gjeneralë të tjerë kroatë, Mladen Markaç dhe Ivan Çermak, për të
cilët u kërkuan 23 e 17 vjet burgim. Gjykata e Hagës deklaroi të pafajshëm Çermak,
ndërsa Markaç u dënua me 18 vjet. Sipas analistëve, vendimi do të jetë me pasoja
për politikën e shoqërinë kroate. Është e vërtetë se shumica e kroatëve dëshiron të
zhvillohen proceset për kriminelët e luftës, por përqindja zbret me shpejtësi nëse
shtrohet çështja e “heronjve të luftës patriotike”, siç quhet në Kroaci lufta e viteve
’90 me Serbinë e Millosheviçit. Vështirë që opinioni publik kroat të pranojë se
në luftën patriotike për çlirimin e vendit nga serbët, të jenë kryer edhe krime kundër
njerëzimit. Prandaj, vendimi i Gjykatës së Hagës mund të zgjojë ndjenja antievropiane,
që mund të ndikojnë mbi referendumin e vjeshtës, në të cilin Kroacia duhet të thotë
qartë nëse dëshiron të integrohet në Bashkimin Evropian. Por mund të ketë pasoja edhe
mbi politikën e brendshme, duke penalizuar krerët aktualë të shtetit e të qeverisë,
të cilët përjetojnë një krizë të rëndësishme, pas akuzave për korrupsion, që çuan
në arrestimin e ish-kryeministrit Ivo Sanader. Zgjedhjet janë afër, së shumti mund
të zhvendosen në fillim të vitit 2012 dhe, dënimi i Gotovinës mund të sjellë forcimin
e së djathtës ekstreme.