Atë Luigji Paliq, martir, në përvjetorin e lindjes
Kujtojmë sot martirin shqiptar, Atë Luigjin Paliq në përvjetorin e lindjes. Ai lindi
në Janjevë, afër Prishtinës, në dioqezën e Shkup-Prizrenit, më 14 prill 1878. Prindërit
Toma e Paulina e pagëzuan me emrin Mati. Që i vogël u thirr nga Zoti për rrugën rregulltare
në radhët e fretërve të vegjël françeskanë. Studioi në Shkodër, Troshan e Itali, ku
më 23 shtator 1896 veshi zhgunin e Shën Françeskut. Kushtet e përkohshme rregulltare
i bëri më 23 shtator 1897, të përjetshmet, më 8 dhjetor 1901.
Mbas kremtimit
të Meshës së parë, më 20 prill 1903, nisi misionin si bari i shpirtrave në Baz, 10
orë larg Lezhës, e njëkohësisht mblodhi lëndën që i nevojitej për ndërtimin e Kishës
së re të Gllogjanit.
Nga fundi i shkurtit 1913 sllavët filluan persekutimin
e shqiptarëve katolikë, duke nxjerrë si pretekst dorëzimin e armëve. Bariu trim u
kap e u burgos në burgun e Gjakovës, në sa vizitonte besimtarët e shpërndarë në fshatra
të ndryshme, për t'i përforcuar në fenë e krishterë të të parëve, e cila ishte në
rrezik. I kërkuan ta mohonte publikisht këtë fe. E dërmuan me shuplaka e me shkopinj,
e pështynë, e fyen, pastaj e nxorën para një gjykate, që e ngarkoi me shpifje. Së
fundi, me 52 të burgosur të tjerë, e nisën rishtas për Pejë. Pater Luzi, siç e quante
populli, ishte gjysmë i zhveshur, i mbuluar me plagë.
Dëshmitarët e kësaj
ngjarjeje treguan më pas se ai nuk mund të ecte më. Atëherë nisi të hiqej zvarrë,
i ngacmuar, i pështyrë, i shtyrë nga ushtarët. I mungonte vetëm Kryqi, për t'i përngjarë
plotësisht Krishtit. Një pop i bëri thirrjen e fundit të ndërronte fenë, në se nuk
donte të humbiste jo vetëm kokën, por dhe shpirtin, i cili do t'i digjej në fund të
skëterrës. Ai s'u përkul, nuk u thye as nga mundimet e as nga premtimet. U tregoi
atyre njerëzve të armatosur deri në dhëmbë se për të feja e populli i tij vlenin më
shumë se vetë jeta. E mbytën më 7 mars 1913, duke e shporuar me bajoneta e kështu
e bënë edhe më të ngjashëm me Krishtin e i falën një martir të ri Kishës katolike
në Shqipëri.
Gazetat evropiane të kohës, si e përshkruanin këtë ngjarje të
shëmtuar, shkruanin: "Nuk mund të mendohet që një punë e tillë të ngjasë në Evropën
e shekullit XX". Gjithsesi askush nuk e luajti gishtin për t'ia prerë rrugën tragjedive
të tilla, për t'i dhënë fund martirizimit të të krishterëve në trojet shqiptare. Pas
Atë Luzit (Luigjit), mbytur barbarisht nga serbët, për shkak rë mbrojtjes e rrëfimit
të Ungjillit të Krishtit e të identitetit kombëtar, do të binin në fushën e betejës
disa qindra të tjerë.
E Evropa, ishte rishtas me gojë hapur, sikur trojet shqiptare
të mos ishin pjesë e saj, do të çuditej duke parë si në Kolosetë moderne bijtë e Krishtit
vijonin ta dhuronin pa kursim gjakun për Ungjillin e Krishtit, për Kishën e tyre,
për popullin e tyre, për Atdheun e tyre e, pse jo, edhe për një Evropë më të krishterë,
më të mirë! Shumë bujë bëri vdekja e këtij martiri të fesë e të kombit. E shumë hetime
e bisedime diplomatike shkaktoi.
Më në fund, më 7 tetor 1913, në praninë e
Kolonelit austro-hungarez Schueler, përfaqësuesit të qeverisë malazeze Sposojeviç,
ipeshkvit imzot Lazër Mjedës dhe një turme pafund me rregulltarë e besimtarë, u bekua
guri i parë i Kishës së re në Gllogjan. Të nesërmen, më 8 tetor 1913, e njëjta turmë
u mblodh afër Janoshit, tek varri i Atë Luzit, mbi krye të të cilit ishte vendosur
një Kryq hekuri me këtë mbishkrim: "P. Aloysius Paliq, ndërroi jetë në vitin e Hyjit
1913" . Ky varr, ku imzot Mjeda kremtoi Meshën e parë për shpirt të martirit, është
kthyer prej kohe në vend shtegtimi e në të ardhmen urojmë të kthehet në një elter
të ri. Martiri fitoi!