Мінск: каталіцкая супольнасць спачувае пацярпелым падчас тэракту
12 красавіка ўвечары
званы Мінскай архікатэдры можна было пачуць раней чым заўсёды. У 17.56 – роўна праз
суткі пасля тэрарыстычнага акту ў метро званы галоўнай каталіцкай святыні Беларусі
напряцягу 15 хвілін білі ў памяць аб ахвярах трагедыі. Католікі сталіцы вельмі эмацыянальна
ўспрынялі тое, што адбылося. Вернікі прыходзілі ў касцёлы як для прыватнай малітвы,
так для ўдзелу у супольнай Эўхарыстыі ў інтэнцыі ахвяр.
Біскуп Антоній Дзям’янка
выйшаў з ініцыятывай наведвання параненых: “Нашыя святары наведалі ў шпіталях хворых
і пацярпелых падчас тэракту. Я асабіста наведаў шпіталь нумар тры, ў якім аказаўся
мой аднакласнік. - сказаў ён - Я маліўся за іх і над імі. Маліўся за медыкаў і удзяліў
ім благаслаўленне. Я спаткаўся не толькі з католікамі і але з іншымі хрысціянамі.
Выказаў ім словы салідарнасці ад імя вернікаў Каталіцкага Касцёла. Мяне вельмі ўразілі
апавяданні людзей, прайшоўшых праз гэтую трагедыю”, - сказаў дапаможны біскуп Мінска-Магілёўскай
архідыяцэзіі.
Многія вернікі архікатэдры не хавалі сваіх пачуццяў, адзін з
іх, Мікалай адзнычыў: “Вельмі ўразіла тое, што адбылося ўчора ў цэнтры Мінска. Я прыйшоў
сёння ў храм, каб аддаць гэтую трагедыю Богу, Хрысту. Каб маліцца і за памерлых і
за жывых, якія сёння знаходзяцца ў цяжкім стане, а таксама за медыкаў”. “Вечны адпачынак
дай ім Пане, а святло вечнае няхай свеціць тым, хто адыйшоў з гэтага жыцця”, - эмацыйна
адзначыла пажылая парафіянка катэдры.
Некаторыя вернікі набывалі знічы, каб
запаліць іх падчас наведвання месца трагедыі. Тым часам каля ўваходу ў пераход метро,
сярод мноства кветак можна было ўбачыць і невялікі абраз Маці Божай Будслаўскай –
апякункі Беларусі.