Kishat e krishtera të Libisë i shkruajnë OKB-së: të ndalet gjakderdhja
(13.04.2011 RV)“Dhuna dhe gjakderdhja duhet të ndalen menjëherë, sepse lufta
nuk është zgjidhja e problemeve”: këtë kërkon deklarata e Këshillit Ekumenik të Kishave
të Tripolit, që iu dorëzua sot Zyrës lokale të OKB-së. Dokumenti, i shkruar në arabisht
e në anglisht, është publikuar nga agjensia e Vatikanit “Fides”. Një nga nënshkruesit,
vikari apostolik i Tripolit, imzot Gjovani Inoçenco Martineli. “Si bashkësi besimtarësh
–lexohet në tekst – jemi tejet të trishtuar nga ngjarjet e fundit tragjike, që po
përçajnë vendin me anë të vuajtjeve, të frikës e të ankthit të popullit të vet, të
cilit dëshirojmë t’i shprehim solidaritetin tonë”. Kishat e krishtera kërkojnë një
armëpushim të menjëhershëm e pa kushte nga të gjitha palët dhe asistencë humanitare
për viktimat. “Dialogu dhe pajtimi – theksohet në deklaratë – duhet të jenë rruga
kryesore për të gjetur një zgjidhje miqësore e për të sjellë paqen”. Të krishterët
mbështesin çdo përpjekje të këshillave të pleqve të vendit, të cilët njohin me themel
ndjenjat dhe aspiratat e vërteta të popullit libian. Përkrahin gjithashtu, ato nisma
të organizatave ndërkombëtare, që kanë për qëllim krijimin e një atmosfere besimi
për gjetjen e zgjidhjes paqësore. “Do të vazhdojmë të lutemi, në solidaritet me të
gjithë myslimanët libianë, që luftojnë për paqen e drejtësinë, në këtë çast të vështirë
të historisë së vendit”, përfundon teksti, i cili u është dorëzuar përfaqësuesve të
Kombeve të Bashkuara.