Апублікавана праграма візіту Бэнэдыкта XVI у Германію
Канферэнцыя Каталіцкіх
Біскупаў Германіі апублікавала сёння праграму афіцыйнага візіту Бэнэдыкта XVI у гэту
краіну 22-25 верасня 2011 г. Іерархі падкрэсліваюць, што Святы Айцец зацвердзіў прапанаваную
яму праграму падчас сустрэчы са старшынёй нямецкай біскупскай канферэнцыі арцыбіскупам
Робертам Цолічам. Яна ўключае ў сябе прабыванне Папы ў Берліне, Эрфурце і Фрайбургу.
У кожнай з гэтых трох дыяцэзій Папа правядзе св. Імшы на адкрытым паветры з удзелам
шматтысячных груп вернікаў. Арцыбіскуп Цоліч з задавальненнем заявіў, што, зараз наступае
фаза рэалізацыі планаў. “З сярэдзіны мая, мы пачынаем працэс падачы заявак праз Інтэрнэт
на ўдзел у папскіх мерапрыемствах. Я перакананы, - сказаў арцыбіскуп - што апостальскае
падарожжа дынамізуе жыццё нашага Касцёла і нашай краіны".
Біскуп Эрфурта Ёахім
Ванкэ выказаў задавальненне, што візіт Папы прадугледжвае знаходжанне ва Усходняй
Германіі. "Тут стане зразумелым, што Папа ідзе не толькі ў каталіцкі храм.- сказаў
ён – Падчас візіту ў Эрфурце, дзе Марцін Лютэр быў каталіцкім законнікам, будзе пастаўлены
моцны экуменічны акцэнт".
Апостальскі адміністратар Берлінскай дыяцэзіі біскуп
Маціяс Хайнрых сказаў, што візіт Папы ў сталіцы Германіі, якая не з’яўляецца ў большасці
каталіцкай, прымушае католікаў ганарыцца тым, што Святы Айцец з'яўляючыся Наступнікам
Пятра, сустрэнецца тут з вышэйшымі прадстаўнікамі дзяржаўных уладаў і прамовіць у
нямецкім Бундэстагу.
Апублікаваная праграма – уступная. Яе канчатковы варыянт
будзе апублікаваны за некалькі тыдняў да апостальскага падарожжа Бэнэдыкта XVI у Германію.