(12.04.2011 RV)Ajo që deri tani shihej vetëm si rrezik i mundshëm, u bë realitet.
Agjensia japoneze për sigurinë bërthamore e ngriti nivelin maksimal të klasifikimit
të aksidentit në centralin e Fukushimës, në 7. Është niveli më i lartë i mundshëm,
i njëjtë me atë të Çernobilit në vitin 1986. Në terrenin e në vegjetacionin pranë
Fukushimës janë gjetur tani edhe gjurmë stronciumi, metal i rëndë radioaktiv, që mund
të shkaktojë leuçeminë. Sipas ministrisë japoneze të Shkencave, tani për tani, prania
e këtij elementi nuk është e rrezikshme për shëndetin. Elementë të tjerë të gjetur
deri tani janë jodi dhe çeziumi, në sasi jashtë normave, si edhe plutoniumi, në doza
të vogla.