Mubarak i akuzuar për korrupsion dhe dhunë. Imzot Fitcxherald: Egjipti përjeton fazë
pasigurie
(11.04.2011 RV)Pas mesazhit të ish-presidentit egjiptian, Hosni Mubarak, me
të cilin ai e shpall veten të pafajshëm, deklaron se nuk ka llogari bankare jashtë
shtetit e se nuk është pasuruar gjatë viteve të pushtetit të tij, qindra vetë mbushën
sërish sheshin Tahrir në Kajro, në shenjë proteste. Manifestime janë zhvilluar edhe
ditëve të kaluara, për të kërkuar largimin e funksionarëve të korruptuar nga postet,
ku i ka vendosur ish-presidenti, Mubarak. Në ndeshjet me ushtrinë, ka pasur një viktimë
e dhjetra të plagosur. Gjithsesi, qeveria egjiptiane lajmëroi se do t’i plotësojë
kërkesat e protestuesve. Vërtet, do të krijohet një komision i veçantë hetimor për
ish-presidentin Mubarak dhe bijtë e tij, të akuzuar për korrupsion dhe për shtypjen
me dhunë të popullsisë civile gjatë revoltave, që e detyruan të largohet nga pushteti
dy muaj më parë, më 11 shkurt. Gjithashtu, ushtarakët në fuqi urdhëruan heqjen e katër
guvernatorëve të regjimit të vjetër. Mbi gjendjen në Egjipt, të dëgjojmë nuncin
apostolik në vend, imzot Majkëll Fitcxherald:
Jemi në një fazë tranzicioni,
në një fazë pasigurie, por ka shpresa të mëdha e njëkohësisht, edhe shqetësime. Partitë
politike po përgatiten për zgjedhjet e shtatorit të ardhshëm. Sigurisht partia e “Vëllezërve
Myslimanë” është më e organizuara. Partia Demokratike Kombëtare i ka humbur krerët
e nuk e di si do të paraqitet e nëse do të paraqitet në zgjedhje. Po organizohen edhe
parti të tjera, ku të krishterë e myslimanë punojnë së bashku.
Cili është
roli i të krishterëve, në veçanti, ai i katolikëve, në këtë fazë delikate politike?
Është
shumë pozitiv fakti, që të rinjtë e krishterë, sidomos të rinjtë katolikë, po përpiqen
t’i kuptojnë problemet e shoqërisë së sotme, të kuptojnë se ku na çon ndryshimi i
Kushtetutës. Këto probleme studiohen me ndihmën e ekspertëve, të cilët thirren për
të marrë pjesë në takime të ndryshme. Përsa i përket zgjedhjeve, duhet të themi se
“Vëllezërit Myslimanë” nuk janë të vetmit në frontin islamik, ka edhe grupe të tjera.
Ekziston pra, një farë fragmentimi, që ndoshta mund t’u krijojë më tepër mundësi liberalëve,
të krishterë e myslimanë, të fitojnë vende në parlament.
A ka rrezik që
revolucioni të kalojë në duart e fondamentalizmit islamik?
Sigurisht, disa
nga myslimanët kanë propaganduar se vendi rrezikon ta humbasë karakterin e tij islamik.
Jemi në një fazë tranzicioni, në të cilën është Këshilli i Lartë i Forcave të Armatosura,
ai që e drejton vendin. Shpresojmë që kjo fazë të mos zgjatet shumë e Egjipti të fillojë
shpejt ndërtimin e një të ardhmeje më të mirë.