Ipeshkvi i Tripolit: të mërkurën, dokument i përbashkët i feve për OKB-në
(11.04.2011 RV)Bashkësitë fetare të Libisë po përgatisin një dokument të përbashkët,
ku kërkohet fundi i dhunës në vend. Ai do t’i dorëzohet të mërkurën OKB-së, sipas
deklaratës së vikarit apostolik të Tripolit, imzot Gjovani Inoçenco Martineli, për
agjensinë vatikanse Fides. “Kishat e krishtera në Libi – deklaron imzot Martineli
– duan të mbështesin ndërmjetësimin e Bashkimit Afrikan”. Vikari apostolik sqaron
se sapo ka marrë pjesë në një takim të Shoqatës Botërore Islamike, ku bëjnë pjesë
250 organizata. Bashkësitë e krishtera të Tripolit, të pranishme në mbledhje, shprehën
dëshirën të hartojnë një komunikatë të përbashkët me myslimanët për të kërkuar fundin
e krizës libiane. Ndërkaq, diplomacia ndërkombëtare është në punë për të ndalur
luftën civile në Libi. Dje, Muhamar Gedafi pranoi planin e Bashkimit Afrikan për armëpushimin
e menjëhershëm, që parashikon edhe fundin e bombardimeve të NATO-s, por sekretari
i Paktit të Atlantikut, Rasmusen paralajmëroi se më parë duhet verifikuar respektimi
i armëpushimit. Një delegacion i Bashkimit Afrikan shkoi edhe në Bengazi, të flasë
me rebelët, të cilët kërkojnë largimin përfundimtar të Gedafit e të familjes së tij
nga pushteti. Propozimi i Bashkimit kërkon armëpushimin e menjëhershëm, nxitjen e
dialogut kombëtar, mbrojtjen e të huajve të pranishëm në Libi dhe furnizimin me ndihma
humanitare. Pavarësisht nga deklaratat, koloneli vazhdon të bombardojë Misratën,
ku sipas UNICEF-it, janë vrarë edhe fëmijë të porsalindur. Gjatë 20 ditëve të fundit
kanë gjetur vdekjen së paku 20 foshnja, nën moshën 9 muajshe e shumë fëmijë të tjerë
nën 10 vjeç. Në këtë gjendje, a mund të ketë sukses ndërmjetësimi i Bashkimit Afrikan?
I kërkuam një mendim pedagogut italian Antonio Papiska, në krye të katedrës
së UNESCO-s për të drejtat e njeriut, për demokracinë e paqen, pranë Universitetit
të Padovës: Duhet ta lemë mënjanë skemën e lojës, ku shuma është zero: domethënë,
fitorja s’mund të jetë e gjitha nga njëra anë e humbja, e gjitha nga ana tjetër. Kemi
një ofertë ndërmjetësimi e çdo lloj hapësire për paqen duhet shfrytëzuar. Unë do të
thosha se në këtë çast, bashkësia ndërkombëtare duhet t’i marrë seriozisht propozimet
e njërit prej institucioneve kompetente për zonën – që janë Bashkimi Afrikan dhe Lidhja
Arabe – e mbi këtë bazë, të imagjinojë hapa të tjera. Cilat janë këto hapa
të tjera sipas jush, duke pasur parasysh rezolutën e OKB-së… Rezoluta 1973 e
përjashton mundësinë që ndërhyrja të shndërrohet në forma pushtimi territorial, por
nuk ia mbyll dyert ndërhyrjes tokësore. Natyrisht forcat tokësore duhet të kenë mandat
të caktuar e duhet të marrin parasysh vullnetin e Tripolit për zgjidhje diplomatike.
Kusht “sine qua non” është mospërdorimi i armëve nga ana e Gedafit. Por kjo
mund të çojë edhe në ndarjen e Libisë… Po, natyrisht, kjo është një hipotezë
e mundshme, por në këtë çast, bashkësia ndërkombëtare duhet të ketë si objektiv ndalimin
e dhunës nga njëra e nga tjetra palë. Për të shmangur gangrenizimin e situatës, bashkësia
ndërkombëtare duhet të interesohet për çështjen libiane, në kuadrin e ndryshimeve
strukturore, që po ndodhin në të gjithë zonën. Bota duhet të jetë e pranishme e të
gjejë mjetet për të favorizuar forcat lokale, që punojnë për lirinë, demokracinë,
për të drejtat e njeriut e shtetin ligjor. Është politika, që duhet ta marrë iniciativën.