Kombet e Bashkuara denoncojnë masakrat në Bregun e Fildishtë. Gjenden mbi 100 trupa
të pajetë
Kombet e Bashkuara kanë denoncuar masakra të reja në Bregun e Fildishtë. Në 24 orët
e fundit një kuadër e OKB-së ka zbuluar mbi 100 trupa të pajetë në tri lokalitete
në pjesën perëndimore të Bregut të Fildishtë. Dhuna e vrasjjet duket se janë bërë,
pjesërisht, për motive “etnike”, shpjegoi sot në Gjenevë Ruper Colvile, zëdhënës i
komisariatit të Lartë të KB-së për të drejtat njerëzore. Ky zbulim u bë një ditë
pasi Alasane Ouatara, i njohur nga komuniteti ndërkombëtar si fitues i zgjedhjeve
presidenciale në Bregun e Fildishtë, shpalli se refuzimi i presidentit aktual, Laurent
Gbagbo, për ta dorëzuar pushtetin, e ka zhytur këtë vend në një krizë të thellë humanitare.
Popullsia lokale gjendet në një situatë tejet kritike, e agjenci të ndryshme të
OKB-së – mes tyre edhe Programi ushqimor botëror – kanë kërkuar hapjen e një korridori
humanitar, për të ndihmuar mbi 300 mijë njerëz të pastrehë brenda vendit, e duhet
llogaritur edhe refugjatët e Bregut të Fildishtë që gjenden në Liberi, Guinea e Gana,
siç njofton Karitasi. Sipas kësaj organizate kishtare, lypet afër 1 milion euro për
ndihma humanitare urgjente për të përballuar situatën kritike. Ndërkohë ish presidenti
Gbagbo nuk e lë bunkerin e tij në Abigjan, i cili rrethuar nga mbështetësit e presidentit
të ri të zgjedhur Ouattara.