Ըստ «ԱՅՐԻՇ ՍԵՆԹՐԸԼ» Կայքէջին Սամանթա Փաուըր Կրնայ Միացեալ Նահանգներու
Յաջորդ Արտաքին Գործոց Նախարարը Դառնալ ։
Ամերիկեան «Այրիշ Սենթրըլ» կայքէջը կը հաղորդէ, որ ազդեցիկ «Նիւ Եորք Թայմզ» օրաթերթին
մէջ Միացեալ Նահանգներու նախագահ Պարաք Օպամայի օգնական Սամանթա Փաուըրի մասին հրապարակուած
գովասանական յօդուածը բազմապատկած է այն լուրերը, թէ ան կրնայ Միացեալ Նահանգներու յաջորդ
արտաքին գործոց նախարարը կամ նախագահի ազգային անվտանգութեան հարցերով խորհրդականը դառնալ: Փաուըր
Միացեալ Նահանգներու արտաքին գործոց նախարար Հիլըրի Քլինթընի հետ եղած է Լիպիոյ նկատմամբ
քաղաքականութեան ճարտարապետը եւ Սպիտակ Տան մէջ հեղինակութիւն կը վայելէ: Կը նշուի, որ
նախագահ Օպամայի նախագահական նստաշրջանի առաջին ժամկէտի աւարտէն ետք, երբ Քլինթըն հեռանայ,
Փաուըր կը դառնայ արտաքին գործոց նախարարի իսկական թեկնածու, եթէ Օպամա երկրորդ անգամ
ընտրուի: «Սպիտակ Տան մարդկային իրաւանց պաշտպանութեան հարցերուն մէջ անոր ձայնը լսելի
է», «Նիւ Եորք Թայմզ»ին ըսած է «Հիումըն Ռայց Ուոչ» կազմակերպութեան գործադիր տնօրէն
Քեննեթ Ռոթ` աւելցնելով. «Ան Օպամայի վրայ ազդեցութիւն ունի»: Սամանթա Փաուըր 2002-ին
«Փուլիցըր» մրցանակին տիրացած էր Ցեղասպանութիւններու մասին գրի առած իր «Խնդիր դժոխքէն»
գիրքին համար, որուն մէջ կը դիտարկուի Միացեալ Նահանգներու արտաքին քաղաքականութեան արձագանգը
Ցեղասպանութեան նկատմամբ: Գիրքին մէջ ան համոզում կը յայտնէ, որ Հայերու, Հրեաներու,
Քամպոճիոյ եւ Ռուանտայի Ցեղասպանութիւնները տեղի ունեցած են, որովհետեւ պետական իշխանութիւնները
աչք փակած են, իսկ առանձին անձեր որոշած են չմիջամտել: «Ամէնէն տարածուած պատասխանը`
«մենք չենք գիտեր»ն է, ինչ որ ճիշդ չէ», կը գրէ Սամանթա Փաուըր: