14 красавіка у Рыме
ў Папскім універсітэце “Regina Apostolorum” пройдзе форум на тэму: ”Моладзь у сацыяльнай
камунікацыі”. Яго арганізуе Інстытут вышэйшых даследаванняў над становішчам жанчын
таго ж універсітэту ў супрацоўніцтве з Еўрапейскім універсітэтам Рыму, пад патранатам
Папскай рады па культуры.
Форум “Моладзь у сацыяльнай камунікацыі” намагаецца
звярнуць увагу на асноўны аспект сучаснай культуры: камунікацыю ў лічбавую эпоху.
Удзельнікі паспрабуюць даць адказ на словы Папы, якія ён звярнуў да ўдзельнікаў пленарнай
асамблеі Папскай рады па культуры: “У свеце, у якім дамінуе сацыяльная камунікацыя,
Касцёл, прапаведваючы Евангелле збаўлення ўсім людзям, не можа застацца абыякавым
і чужым. Ён намагаецца выкарыстаць з яшчэ большым імкненнем, але і крытыкай, а таксама
разважлівасцю, новыя мовы і новыя спосабы камунікацыі” ( 13 лістапада 2010).
Форум
адкрые пасол Егіпта пры Апостальскай Сталіцы, які распавядзе пра тое, як егіпецкая
моладзь выкарыстоўвала сацыяльныя сеткі, каб абвясціць свету сваё імкненне да будучыні
і свабоды. Карло д’Асаро Бйондо, прэзідэнт Google ў Еўропе, Афрыцы і Блізкім Усходзе
раскажа аб вялікіх культурных зменах і эканамічных магчымасцях самай папулярнай пошукавай
сістэмы ў свеце. Удзельнікі правядуць дыскусію на тэму радыкальных змен на прыкладзе
амерыканскага і ангельскага банкаўскіх і фінансавых сектараў.