Куба: Касцёл заклікае рэфармаваць сферу аховы здароўя

Касцёл на Кубе заклікаў улады да тэрміновай рэформы сістэмы аховы здароўя. Гэта астраўная дзяржава доўгі час ганарылася ўзроўнем медыцыны, як здабыткам сацыялістычнай рэвалюцыі. Паслугі ў гэтай галіне былі агульнадаступнымі і бясплатнымі. Сёння, аднак, уся сістэма аховы здароўя адчувае недахоп фінансавых рэсурсаў, церпіць ад карупцыі і нізкага ўзроўню паслуг. Да гэтага прычыніўся распад Усходняга блока, які на працягу многіх гадоў эканамічна падтрымліваў рэжым Кастра.

Па словах прэс-сакратара гаванскай архідыяцэзіі, шукаючы выхаду з крызісу неабходна браць пад увагу новыя формы працы сістэмы аховы здароўя, у тым ліку выкарыстанне прыватнай ініцыятывы.

Арланда Маркес на старонках касцёльнага часопіса “Palabra Nueva” нагадаў скандал, звязаны са смерцю ад голаду і холаду 26 пацыентаў псіхіятрычнай клінікі ў Гаване, дзе супрацоўнікі рэгулярна кралі прадукты харчавання. Па словах прэс-сакратара, гэта быў не адзінкавы выпадак, а "вярхушка айсберга".

"Калі зніклі папярэднія ўмовы рэалізацыі праграмы ў галіне аховы здароўя, трэба шукаць новыя формы аднаўлення сістэмы і яе стабільнасці", - кажа Маркес. У якасці канкрэтнай прапановы выказаў думку аб магчымасці дапушчэння ў нацыянальную сістэму аховы здароўя рэлігійных арганізацый або выкарыстання прыватна-дзяржаўнага партнёрства. Гэта было б сугучна з абвешчанымі Раулем Кастра эканамічнымі рэформамі. "Нават калі дыверсіфікацыя ўласнасці і зварот да прыватнага сектара не створыць рай на зямлі, то дапаможа зменшыць маштабы карупцыі і амаральнасці, якія пагражаюць краіне знішчэннем", - напісаў на старонках кубіскага каталіцкага штотыднёвіка прэс-сакратар гаванскай архідыяцэзіі Арланда Маркес.