Kardinali Sherer: përshpirtëria popullore është pasuri e madhe e Amerikës Latine.
Vazhdojnë në Vatikan punimet e Asamblesë Plenare të Komisionit Papnor për Amerikën
Latine, që kanë si temë kryesore ndikimin e përshpirtërisë popullore në procesin e
ungjillëzimit të ri. Nesër paradite është në program audienca e Papës për pjesëmarrësit
e këtij takimi të nivelit të lartë. Përshpirtëria popullore është një pasuri e
madhe e Amerikës Latine. Ekzistojnë manifestime të shumta fetare që nuk janë zyrtare
në Kishës, por që janë shumë të fuqishme e shumë të pranishme në bashkësitë vendore
kishtare e në jetën e njerëzve, si për shembull shenjtëroret apo shtegtimet. Kardinali
Scherer thotë se “ne besojmë se religjioziteti popullor apo feja popullore në Amerikën
Latine është një pasuri e jashtëzakonshme. Popujt tanë janë shumë besimtar, pra fetar
dhe duam ta shprehin fenë e tyre më forma popullore, ndoshta janë shumë të thjeshta,
por janë edhe me vlerë të madhe e domethënie të madhe, që i ndihmojnë besimtarët e
popujt ta ruajnë fenë e tyre e t’ua transmetojnë brezave të ri. Religjioziteti
popullor e përshpirtëria popullore janë pa dyshim fryt i vet inkulturimit të fesë
së krishterë, që ka prodhuar shumë shprehje e dëshmi të fesë. Pastaj, është edhe fryt
i vet jetës së Kishës: kulti ndaj Zojës së Bekuar, shtegtimet, përshpirtëria ndaj
shenjtorëve. Kulti ndaj Eukaristisë e kjo buron nga misteri i fesë. Është pra një
pasuri e madhe: nga njëherë përzihet me elemente që vijnë prej kulturave të ndryshme,
nga një herë tjetër edhe me elemente fetare që vijnë prej feve origjinale, që duhet
të pastrohen akoma e të përcaktohen më mirë e më saktë. Sidoqoftë feja popullore është
një vlerë e madhe e për ungjillëzimin e ri përfaqëson me siguri një udhëtim e një
udhë të çmueshme për realizimin e ungjillëzimit të ri.