Joakin Navarro-Valls: Gjon Pali II i foli për Zotin një breznie të tërë.
Ditët e kalendarit zëvendësojnë njëra-tjetrën e afrohet gjithnjë më shumë dita e Lumnimit
të Gjon Palit II. Kjo ngjarje, që sigurisht do të mbetet e paharrueshme në kujtesën
e mbarë njerëzimit, po paraprihet nga një mori nismash, për ta bërë sa më të njohur
figurën e Tij vigane. Natyrisht, emocionin më të madh e ndjejnë ata, që patën fatin
të punojnë krah-për-krah me Papën Vojtila, siç është rasti i ish-drejtorit të Sallës
vatikanase të Shtypit, Joakín Navarro-Valls, i cili, në intervistën dhënë, me këtë
rast, Radio Vatikanit, flet për emocionin e thellë, që provoi, kur mori vesh lajmin
për Lumnimin e Gjon Palit II:
Përgjigje: - Do të thosha, të njëjtat
ndjenja, që provova pak minuta pas vdekjes së tij, në mbrëmjen e 2 prillit 2005. E
prita, pra, me ndjenjat e mirënjohjes së thellë ndaj këtij Njeriu, ndaj këtij Pape,
që na foli për Zotin – e jo vetëm mua, natyrisht, por një breznie të tërë. Në mënyrë
të drejtpërdrejtë. Na ndihmoi ta bëjmë tonin thesarin e vlerave njerëzore e kristiane,
zëdhënës i të cilit është Papa.
Pyetje: - Ju jetuat për 20 vjet me radhë
pranë Gjon Palit II e, natyrisht, e ndjetë fort praninë e tij. Po pas 2 prillit 2005?
Sa është i pranishëm Gjon Pali II në shpirtin tuaj pas kësaj date?
Përgjigje:
- Pyetja juaj më sjell në kujtesë ditët menjëherë pas vdekjes së tij, më kujton
një nga konferencat e shtypit, që vijoja t’i jepja pothuajse për ditë, gjatë periudhës
së selisë vakante. Një gazetare, më duket se ishte gjermane, më bëri pyetjen: “A ju
mungon Gjon Pali II, juve, që ishit pranë tij gjatë gjithë viteve të papnisë?” Iu
përgjigja: “Jo, nuk më mungon!”. Nuk më mungonte, nuk më mungon, sepse më parë – e
kjo varej nga tipi i punës – mund të rrija me të dy ose tri orë në ditë, ndërsa tani
rri 24 orë. Ai është i pranishëm në jetën time gjatë 24 orëve të ditës e të natës.
I lutem të më japë dorën, kur kam nevojë, ashtu si kërkoja, shumë përvujtërisht, t’i
jepja dorën në një nga aspektet e papnisë: në aspektin komunikativ.
Pyetje:
- Cila është dhurata më e madhe, që ju ka bërë Gjon Pali II si njeri e si besimtar?
Përgjigje:
- Mendoj se trashëgimia e tij më e madhe është ai vetë, sepse mbetet shembull
i asaj, që kërkon të jetojë çdo i krishterë, i Ungjillit, gjë që shihej qartë në çdo
çast të jetës së tij. Kjo është dhurata më e madhe. Dhurata të tjera, të një përmase
tjetër, janë sasia e pafundme e kujtimeve në kontaktin e përditshëm me të, për shumë
vjet.
Pyetje: - A ka ndonjë çast a ndonjë fjalë të Karol Vojtilës, që
e patë në një dritë të re pas vdekjes së Tij?
Përgjigje: - Po, natyrisht.
Më kujtohet një mendim, që ai e përmblidhte në një frazë, të cilën e mbaj mend fjalë
për fjalë. E pati përsëritur në disa raste, si në Unesko, për shembull… Mendimi i
tij ishte: “Një fe, që nuk bëhet kulturë, është fe e mësuar keq, e jetuar keq, e komunikuar
keq”. Ja, këtë frazë e kam gjithnjë në kokë. E kjo është edhe sfida e madhe e këtij
çasti historik: nga njëra anë është feja, ajo që mendojmë se është fe; nga ana tjetër,
problemi i mprehtë: - si ta bëjmë këtë fe kulturë? Një fe, që nuk bëhet kulturë, jetohet
keqas: këtë mendim të Gjon Palit II nuk mund ta shlyejë kurrë nga kujtesa.
Pyetje:
- Shenjt menjëherë! Që nga dita e salikimeve, njerëzit e prisnin këtë çast, kremtimin
e Lumnimit. Mund të thuhet me plot gojën se populli i Zotit e njohu menjëherë shenjtërinë
e Papës Gjon Pali II…
Përgjigje: - Për shumë shekuj Shenjtorët bëheshin
pikërisht për shak të bujës popullore. E këtë e patëm parasysh atë paradite, atë ditë,
kur kremtohej Mesha e Tij e dritës në tremen e Shën Pjetrit. Pse kjo? Sepse njeriu
ka një aftësi të madhe, të pashembullt, që i përket vetëm atij. Është aftësia për
ta njohur të vërtetën. Gjon Palin II e kemi parë të gjithë. Për shumë e shumë vite,
kemi vërejtur përkimin e plotë ndërmjet fjalës që thoshte, fjalës që komunikonte e
asaj që jetonte. Fjala, predikimi e jeta ishin një gjë e vetme. Prandaj mund të
themi se ai i përçonte vlerat e krishtera jo vetëm me atë që thoshte por, mbi të gjitha,
me jetën e vet. Fjala e Zotit, që nuk jetohet, nuk mund të sigurojë kthesën e zemrave.
Zemrat janë tejet të ndjeshme: nuk është e lehtë t’i bësh për vete, ashtu si i bëri
Gjon Pali II.
Pyetje: - Keni thënë një herë se Karol Vojtila kishte
gjithnjë humorin e mirë të shenjtorëve. Ja, më duket gjë e bukur të mendosh se tani
Papa Gjon Pali II po na buzëqesh nga qielli…
Përgjigje: - Po, jam i
sigurt, i bindur. Ati i Shenjtë, përveç shumë e shumë cilësish, kishte edhe këtë:
humorin e mirë, madje, të shkëlqyer! Ishte njeri, që bënte vetëm mirë, e prej këndej,
gjithçka i dukej e mirë. Jeta, sidomos. E kjo buronte drejtpërdrejt nga karakteri
i tij. Ishte thellësisht i bindur se të gjithë jemi bij të Zotit. E kjo të bën të
sigurt, optimist, në të mira e në të vështira. E përfytyroj këtë çast duke vënë në
buzën në gaz. Natyrisht është buzëqeshja më e bukur, sepse tani bën buzën në gaz para
syve të Zotit!