Benedikti XVI: shoqëria nuk e kupton më martesën si bashkim të qëndrueshëm e të hapur
ndaj jetës. Ungjilli na edukon në vlera të vërteta
Kisha nuk mund të mbështetët më në shoqërinë e sotme për një mirëkuptim të martesës
sipas vështrimit e kuptimit të krishterë. Kështu pohoi mes tjerash Benedikti XVI në
fjalimin që u drejtoi sot paradite grupit të ipeshkvijve të Kishës siro-malabareze
të Indisë, të cilët i priti në audiencën me rastin e përfundimit të vizitës së tyre
Ad Limina Apostolorum. Papa Racinger preku edhe temën e thirrjeve të shenjta, atë
të misionit ipeshkvnor si dhe të formimit të përhershëm të rregulltarëve e të besimtarëve. Ta
mendosh sot martesën si një lidhje të qëndrueshme, të patundur, të përhershme, të
hapur ndaj lindjes së fëmijëve, sipas shoqërisë e mediave shoqërore të komunikimit
është diçka e gabuar, jokorrekte, sepse familja është bërë tashmë e thërrmueshme si
vlerat e shumëkujt që e lartojnë dhe fëmijët më shumë pretendohen si një e drejtë
që dëshirohet se sa një dhuratë e Zotit. E pikërisht nga ky konstatim i mprehtë (hollë)
i gjërave që sot mbizotërojnë, buron vlerësimi që Benedikti XVI bënë në një pik të
fjalimit të tij drejtuar ipeshkvijve të Indisë, me traditë siro-malabareze. Në
fjalimin e tij Papa flet për ndryshimet që regjistrohen në shoqërinë bashkëkohore
“në mbarë botën”, të cilat i përkufizon të “shpejta e dramatike”, për “sfidat e rënda”,
por edhe për “mundësitë e reja” që Kisha ka para vetes e për ata njerëz që shpenzohen
për “kumtimin e së vërtetës së mesazhit ungjillor që të bënë të lirë”. T’ia çosh botës
së familjes këtë kumtim, ky për Papën është një impenjim vendimtar i Kishës, sepse
thekson Ati i Shenjtë: “Mjerisht, Kisha nuk mund më të llogaris në mbështetjen
e shoqërisë në përgjithësi për promovimin e vështrimit e të kuptimit të krishterë
të martesës si bashkim të qëndrueshëm e të pazgjidhshëm, që është i hapur ndaj lindjes
së jetës e shenjtërimit të bashkëshortëve”. Pas kësaj, Papa ripohon një nga
një ato parime që sot janë vënë jashtë loje nga relativizmi: “Mbështetja jua,
të dashur vëllezër ipeshkvij, e ajo e meshtarëve tuaj dhe e bashkësive në edukimin
e shëndosh e të tërësishëm të të rinjve në udhën e pastërtisë e të ndërgjegjësimit,
jo vetëm do t’u mundësojë atyre ta përqafojnë natyrën e vërtetë të martesës, por do
të jetë edhe në dobi të kulturës indiane në tërësinë e saj”. Më tej, Papa duke
folur mbi misionin ipeshkvnor, i nxiti prelatët siro-malabarez të jenë shembull e
“mision bashkimi”. Kjo përgjegjësi, pohoi Ati i Shenjtë, “është me rëndësi të veçantë
për një Vend siç është India, ku pasqyrohet bashkimi i Kishës më rite e tradita të
ndryshme e të pasura”. Së fundi, Papa kërkoi që vëmendja e klerit kishtar të përqendrohet
te edukimi dhe bamirësia në vend.